УИХ-ын Төсвийн байнгын хорооны хуралдаанаар Монгол Улсын 2020 оны төсвийн тухай, Нийгмийн даатгалын сангийн 2020 оны төсвийн тухай, Эрүүл мэндийн даатгалын сангийн 2020 төсвийн тухай хуулийн төслүүдийн гурав дахь хэлэлцүүлгийг хийж байна. Энэ үеэр УИХ-ын гишүүн Б.Баттөмөр төсвийн мөнгийг хэмнэх зорилгоор сургууль, цэцэрлэгийн барилгуудыг нэг зураг төслийн дагуу барьж байх нь зүйтэй гэлээ.
Тэрээр “Сургууль, цэцэрлэгийн барилгуудыг нэг стандартад оруулах шаардлагатай. Өөр өөр газарт барьж байгаа 100 хүүхдийн цэцэрлэг, 320 хүүхдийн сургуулиудын зураг төсөл ижил байж болно. Зөвхөн юугаараа өөр байж болох уу гэхээр, хөрснөөсөө хамаарч өөр байна. Мөн барих зардал нь тээвэрлэлтийн зардлаасаа шалтгаалан өөр байж болно. Зарим газар 100 хүүхдийн цэцэрлэгийг 700 сая төгрөгөөр барьж байхад, зарим газар 1.7 тэрбум төгрөгөөр барьж байна. Газрын хөрсийг нь хүчитгэх, тээвэрлэх зардлаас болоод ийм их ялгаатай байна гэж байхгүй ш дээ. Тиймээс цаашдаа нэг зураг, стандартай болох нь төсвийн төлөвлөлтөд хэрэгтэй” гэлээ.
