Сонгуулийн насны хоёр сая 111 мянга 842 иргэн бүртгэлтэй байна
Наймхан сарын дараа УИХ-ын ээлжит сонгууль болно. Гэвч УИХ Сонгуулийн хуулиа батлаагүй байна. Үндсэн хуулийн нэмэлт, өөрчлөлтөө баталсны дараа буюу ирэх арванхоёрдугаар сард багтаан Сонгуулийн хуулийг батлахаар төлөвлөж байгаа гэдгийг УИХ-ын Төрийн байгуулалтын байнгын хорооны дарга С.Бямбацогт хэллээ.
Сонгуулийн тухай хууль батлагдсаны дараа СЕХ, УБЕГ гэх мэт байгууллагууд сонгуулийн бэлтгэл ажлыг хангах үүрэгтэй. УБЕГ сонгогчдын нэрийн жагсаалтыг гаргадаг. Одоогийн байдлаар сонгуулийн насны хоёр сая 111 мянга 842 иргэн байгаа ажээ. 2017 оны сонгуулиар нэг хаяг дээр 20-30 хүн бүртгэгдсэн, адилхан овог нэр, регистрийн дугаартай хүмүүс бүртгэгдсэн, нас барсан хүнийг иргэний бүртгэлээс хасаагүй зэрэг зөрчил гарсан. Тиймээс энэ удаад ийм асуудал гаргахгүйн тулд объектод суурилсан буюу газрын кадастрын мэдээллийн санг бий болгож, иргэний улсын бүртгэлийн хаягийн сангаа өөрчлөхөөр болжээ. Үүний дагуу УИХ-ын Төрийн байгуулалтын байнгын хороо удахгүй хаягийн асуудлаар нээлттэй хэлэлцүүлэг хийж, хаягийн сангийн асуудлыг цэгцэлж, холбогдох байгууллагуудаас бодит мэдээллийг сонсож, шийдлийг олохоор төлөвлөжээ. Нэг хаяг дээр олон хүн бүртгэлтэй байна гэх гомдлын тухайд иргэд www.burtgel.mn хаяг руу орж өөрсдийн хаягаа шалгах боломжтой юм. Хэрэв зөрчил гарвал УБЕГ-т мэдээлж, арилгуулах боломжтой юм байна.
2017 оны сонгуулиар үүссэн зөрчлүүдтэй холбоотойгоор дээрх арга хэмжээг авах ёстой ч 2018 оноос хэрэгжиж эхэлсэн Улсын бүртгэлийн багц хуулийн дагуу биеийн давхцахгүй өгөгдлөөр өөрийгөө таниулж сонгуулиа өгдөг болсон учраас нэг хүн олон санал өгөх боломжгүй юм байна. Мөн регистрийн дугаарын сүүлийн хоёр орноос бусад нь адилхан буюу овог нэр, төрсөн он, сар өдөр нь ижил давхцаж болзошгүй 2200 гаруй хүн байдаг ажээ.