Д. Дамба-Очир: БНСУ-ын Элчин сайдын нэрийг яаралтай оруулж ир
УИХ-ын чуулганы нэгдсэн хуралдаанаар Элчин сайдуудыг эгүүлэн татах, томилох тухай Ерөнхийлөгчийн зөвшилцлийг хэлэлцэж байна. Тодруулбал, Ерөнхийлөгч таван улсын Элчин сайдыг татах, зургаан улсад суух Элчин сайдыг томилох зөвшилцөл илгээсэн юм.
Тэгвэл чуулганы хуралдааны үеэр дараагийн Элчин сайдын нэрсийг хэзээ оруулж ирэх тухай асуудал хөндөгдөв. Ингэхэд Ерөнхийлөгчийн Гадаад бодлогын зөвлөх удахгүй дараагийн Элчин сайдуудын нэрийг оруулна гэлээ. Үүтэй холбогдуулан УИХ-ын гишүүн Д.Дамба-Очир “БНСУ-ын Элчин сайдын нэрийг яаралтай оруулж ир. Тэнд хамгийн олон монголчууд суудаг. Хоёр жил орчим Элчин сайдгүй байлаа. Тэр хүмүүсийн нөхцөл байдал хэцүүдлээ. Эмх замбараагүй байна” гэсэн юм.
Харин Гадаад харилцааны сайд Д.Цогтбаатар "Элчин сайдгүй байгаа газарт түр хамаарагчид ажлаа хариуцаад хийж байгаа. Тэндэх ажил хэвийн үргэлжилдэг. Гадаад бодлогын онцлог угаасаа түр хамаарагч нь ажлаа хариуцаад тасралтгүй үргэлжлүүлж байдаг юм. Өмнөд Солонгосын Элчин сайд татагдаад сар гаруй болж байна. Тэр хугацаанд түр хамаарагч нь ажлыг нь үргэлжлүүлж байна. Түр хамаарагчийг бид Элчин сайдын хэмжээнд авч үздэг" хэмээн байр сууриа илэрхийлсэн байдаг.