Өчигдөр 04.00 цагийн орчимд хувийн автомашинаар такси үйлчилгээ эрхлэгч иргэн шатаж байсан гэрээс 6, 7 насны хоёр хүүхдийн амийг аварчээ. Хүүхдүүдийн амийг аварсан иргэн н.Хишигдалай "Чингэлтэй дүүргийн 32-ын тойргоос нэг иргэнийг суулгаад гэр хорооллын гудамж дунд буулгах гээд зогссон. Мөнгөний хариултыг нь өгч байтал "Туслаарай" гээд хүүхэд уйлаад байгаа чимээ сонсогдсон.  Үйлчлүүлж байсан хүн "Тэнд айл шатаж байна, тооноор нь гал дүрэлзэж байна" гэсэн. Тэгээд бид хоёр очоод гэрийн хаалгыг таттал цоожтой байсан, хаалгыг эвдэн ороход 6, 7 насны хоёр хүү шалдан уйлчихсан хөө тортог болчихсон орилолдоод орон дээрээ зогсож байсан. Ээж нь ажилдаа явахдаа хүүхдүүдээ цоожлоод үлдээсэн гэсэн. Энэ хүүхдүүдийг эсэн мэнд гаргахсан гэхээс өөр зүйл бодогдоогүй. Гарч ирээд эрүүл саруул байгааг нь хараад үнэхээр их баярласан" хэмээн ярьжээ.

Тэрбээр эхнэр, таван охины хамт Сонгинохайрхан дүүрэгт оршин суудаг юм байна.