Эрдэс түүхий эдийн өндөр өртөгтэй судалгааг эх орондоо хийх боломжтой болжээ

Монгол Улс, БНХАУ-ын хамтарсан “Эрдэс түүхий эдийн боловсруулалтын лаборатори” ШУА-ийн Хими, химийн технологийн хүрээлэн дээр байгуулагджээ. Энэхүү лабораторийг БНХАУ-ын ӨМӨЗО-ы санхүүгийн дэмжлэгтэйгээр байгуулж байгаа бөгөөд Хөххотын Металлургийн хүрээлэн, ШУА-ийн Хими, химийн технологийн хүрээлэнгийн эрдэмтэн судлаачид хамтран судалгааны ажил хийх юм байна.

Тус лаборатори хүдрийг буталж нунтаглахаас эхлээд, олон төрлийн аргаар баяжуулах, уусгах технологийн туршилт, судалгаа хийх иж бүрэн багаж, тоног төхөөрөмжөөр тоноглогджээ. Эрдэс түүхий эдийн боловсруулалтын хамтарсан лаборатори байгуулагдснаар алт, мөнгө, зэс, төмөр, газрын ховор элемент, нүүрс гэх мэт Монгол орны эрдэс түүхий эдийг баяжуулах, боловсруулах судалгааг эх орондоо цогцоор нь хийх юм.  Түүнчлэн гадаад улс оронд өндөр зардлаар хийлгэдэг технологи туршилтыг монголд хоёр орны өндөр мэргэшсэн мэргэжилтнүүд хамтран гүйцэтгэнэ. Өөрөөр хэлбэл,  хил гаалиар дээж гаргахаас эхлээд үүсдэг бэрхшээл, хүндрэл алга болж байгаа ажээ.   

Уг лабораторийн нээлтэд БНХАУ-ын талаас Шинжлэх ухаан, технологийн яам, ӨМӨЗО-ы Шинжлэх ухаан, технологийн тэнхим, Хөххотын Металлургийн хүрээлэн, Монголын талаас БСШУСЯ, ШУА, Хими, химийн технологийн хүрээлэнгийн төлөөлөл  оролцлоо. Нээлтэд  БНХАУ-ын Шинжлэх ухаан, технологийн яамны Олон улсын хамтын ажиллагааны газрын дарга Руан Шианг Пинг, Монгол Улсын БСШУСЯ-ны Шинжлэх ухаан, технологийн бодлогын газрын дарга Ж.Мөнхбат бусад албаны хүмүүс оролцсон байна.


Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд eagle.mn хариуцлага хүлээхгүй.

Сэтгэгдэл бичих (0)