Нийслэлийн Засаг даргын Тамгын газар, Монголын гэрэл зурагчдын нэгдсэн холбоотой хамтран гэрэл зурагчдын дунд өнгөрөгч наймдугаар сард хуваариласан сэдвийг сугалуулан, тухайн сэдвийнхээ хүрээнд 24 цагийн дотор гэрэл зураг авах 5.5 сая төгрөгийн шагналын сантай “Улаанбаатарын нэг өдөр” гэрэл зургийн уралдааныг зохион байгуулсан юм байна. Нийслэл хотынхоо өнгө төрхийг аль болох гэрэл гэгээтэйгээр харуулж, ард иргэдийн аз жаргалтай, баяр баясгалантай агшныг гэрэл зургийн хальснаа буулгах нь уг уралдааны гол зорилго байжээ.
Өөр өөрийн гэсэн өвөрмөц өгүүлэмжээр дахин давтагдашгүй мөчийг мөнхөлсөн гэрэл зурагчдад Нийслэл Улаанбаатар хот үүсэн байгуулагдсаны 380 жилийн ойн босгон дээр шагналыг нь гардууллаа. Мэргэжлийн ангилалд 28 хүний 129 гэрэл зургаас тэргүүн байрыг Э.Цэнд-Аюуш, дэд байрыг Э.Төрбат, гуравдугаар байрыг Б.Билэгдэмбэрэл нар хүртсэн байна. Сонирхогчдын төрөлд 23 хүн 110 бүтээл ирүүлснээс С.Манас тэргүүн байр, Ц.Балжиннямын бүтээл дэд байранд шалгарчээ. Нийслэлийн түүхт ойг тохиолдуулан зохион байгуулсан гэрэл зургийн уралдаанд оролцогчдын шилдэг 35 бүтээлийн үзэсгэлэн Уран зургийн галерейд өнөөдөр маргааш хоёр өдөр олны хүртээл болон дэлгэгдэж байна.
