Номонд хайртай хүүхэд багачуудын талархлыг хүлээсэн “Ач тусын тухай үлгэрүүд” цуврал өөрийн жүжигтэй болжээ. Энэ цуврал нь зөвхөн номоор зогсохгүй хүүхэд багачуудад зориулсан бүрэн хэмжээний төсөл юм байна. Төслийн хүрээнд хийгдэж байгаа удаах ажил нь “Эрдэнийн гэрэлт судар ба Мандухай охин” хүүхдийн жүжиг юм.
Хүүхдүүдэд бага наснаас нь түүх уламжлалыг таниулах, тэдэнд бусдыг хайрлах, байгалийг танин мэдэх, ёс заншлаа дээдлэх ухагдахууныг суулгахад жүжгийн зорилго оршиж байгаа гэнэ.
Монголын түүхэнд дэх хатдын бага нас хэрхэн өнгөрсөн бол? Энэ асуулт үргэлж сонирхолтой байсан ч хариулт нь түүхийн сурвалжид бага билээ. Тиймээс ч тэдний бага насыг уран сайхны сэтгэмжээр баяжуулан, ургуулан зохиомжилсон нь биеэ олж тайзнаа тавиглах гэж байна.
Өгөөмөр охин Өэлүн, Тусч охин Бөртэ, Эрдэмт охин Сорхугтани, Сониуч охин Есүгэн, Цэцэн охин Мандухай нарын дүр нэг тайзан дээр амилж хүний зан чанарын сайн талуудын ач тусыг хүүхэд багачуудад ойлгуулах нь ээ. Тус бүртээ ном болон хэвлэгдсэн зохиолч Э.Эрдэнэцэцэгийн эдгээр зохиолыг З.Сумъяабазар, Н.Ариунболд нар жүжгийн зохиол болгон найруулагчаар нь Н.Ариунболд ажилласан байна. Мөн Монгол Улсын Морин Хуурын Чуулгын ерөнхий удирдаач Д.Түвшинсайхан жүжгийн хөгжмийг бичиж, ерөнхий зураачаар Б.Бат-Эрдэнэ, бүжиг дэглээчээр Т.Ганбаяр нар ажиллаж, “Алтан тайз” продакшны жүжигчид тоглох юм.
“Эрдэнийн гэрэлт судар ба Мандухай охин” хүүхдийн жүжгийг энэ сарын 21-ээс эхлэн 4 өдөр Монголын хүүхдийн ордонд тоглоно.
Анги хамт үзэж тохиолдолд хямдралтай бөгөөд 99191194 дугаараар холбогдож тасалбар захиалж болох нь ээ.
