Чили: Метроны үнэ нэмснийг эсэргүүцсэн иргэд үймээн дэгдэж, таван хүний амь үрэгдээд байна
-
- Х.Батсайхан
- 2019-10-21 09:29:00
- 0
Чилийн ард иргэд эрх баригчдынхаа явуулж буй бодлогыг эсэргүүцэн жагссан нь үймээн болж хувираад байна. Нийслэл Сантьяго хотод болсон жагсаалын үеэр иргэд хууль сахиулагчдын хооронд мөргөлдөөн болж, багаар бодоход таван хүний амь нас хохирчээ.
Армийнхан иргэдийн эсэргүүцлийг зогсоохын тулд нулимс асгаруулагч хий, даралттай усан буу хэрэглэсэн бөгөөд Вальпараисо, Кокимбо, Биобио зэрэг томоохон хотуудад шөнийн хөл хорио тогтоогоод байна.
Баян хоосны ялгаа ихэсч, нийгэмд бухимдал үүсээд байсан үед метроны зорчих тасалбарын үнэ нэмэгдсэн нь ийнхүү иргэдийг бухимдуулсан байна.
Ерөнхийлөгч Себастьян Пиньера үймээн дарагдсаны дараа ард иргэддээ хандаж хэлсэн үгэндээ “Ардчилал гэдэг дан ганц эрх биш. Ардчилалд өөрийгөө хамгаалах, өөрийг нь устгах гэсэн хүчний эсрэг хуулийн хүрээнд боломжтой бүхнийг хийх эрх бий” хэмээн хатуу мэдэгджээ.
Эрх баригчид бослого үймээнийг “зогссон” гэж байгаа ч таван бүс нутагт онц байдал зарласан хэвээр, нийслэл Сантьяго болон бусад хотын гудамжуудад мянга, мянган цэрэг, танк бэлэн зогссон хэвээрээ байна. Генерал Аугусто Пиночетыг түлхэн унагаж, ардчилал ялсан 1990 оноос хойш тус улсад анх удаа ийм үйл явдал болж байгаа юм.
