Д.Дамба-Очир: Эрүүл мэндийн тухай хуулийг хэрэгжүүлэхээр ирэх онд 39.4 тэрбум төгрөг төсөвлөсөн

УИХ-ын чуулганы өчигдрийн нэгдсэн хуралдаанаар Эрүүл мэндийн тухай хуульд нэмэлт, өөрчлөлт оруулах тухай, Эрүүл мэндийн даатгалын тухай хуульд нэмэлт, өөрчлөлт оруулах тухай хуулийн төслийг хэлэлцэн баталсан. Уг хууль батлагдсанаар 2020 оноос иргэд хорт хавдрын урьдчилсан үзлэгт хамрагдах боломжтой болох бөгөөд хэдэн насандаа ямар шинжилгээ, оношилгоонд хамрагдахыг нарийвчлан заасан.  Хуулийн хэрэгжилтийн талаар хууль санаачлагч, УИХ-ын гишүүн Д.Дамба-Очир өнөөдөр мэдээлэл өглөө. Тэрбээр "Монгол Улсад жилд дунджаар 4.400 хүн хорт хавдрын улмаас нас барж байгаа. Энэ нь хүн амын тоотой харьцуулахад гамшгийн хэмжээнд хүрсэн тоо. Тиймээс хорт хавдрыг зөвхөн ХСҮТ-д биш аймаг, дүүргийн эмнэлгүүдэд оношлох шаардлагатай байгаа юм. Эхний ээлжинд аймаг, дүүргийн эмнэлгүүдэд тоног төхөөрөмж суурилуулж, долоон төрлийн хорт хавдрыг эрт оношлох хууль эрх зүйн нөхцөл ийнхүү бүрдэж байгаа. Манай улсад хавдар дандаа хожуу шатандаа оношлогдож байна. Бидний амьдралын хэвшил, хооллолт зэргээс үүдэлтэйгээр хорт хавдрын өвчлөл залуужсаар байгаа учраас эрт илрүүлэлтийг хийх зайлшгүй шаардлага бий болж байгаа юм. Хавдар нэг, хоёрдугаар шатандаа оношлогдвол эдгэдэг өвчин учраас эрт илрүүлэх нь чухал байна. Хууль батлагдсантай холбоотойгоор 2020 оны төсөвт 39.4 тэрбум төгрөг суулгаж байгаа. Эхний ээлжинд тоног төхөөрөмжүүдийг суурилуулаад хуулийг хэрэгжүүлэхтэй холбоотой журмыг баталж, эрт илрүүлэлтийн хөтөлбөрийг хэрэгжүүлнэ" гэлээ. 

Хуульд зааснаар эрт илрүүлгийн тодорхой заалтууд орсон. Өөрөөр хэлбэл, дөч, түүнээс дээш насны, элэгний В, С вирус тээгч, элэгний архаг үрэвсэл, хатууралтай иргэнийг элэгний хорт хавдрыг эрт илрүүлэх үзлэг, шинжилгээнд жилд 1-2 удаа, дөч, түүнээс дээш насны иргэнийг ходоод, улаан хоолойн хорт хавдрыг эрт илрүүлэх үзлэг, шинжилгээнд жилд 1 удаа, гучаас жаран насны эмэгтэйг умайн хүзүү, хөхний хорт хавдрыг эрт илрүүлэх үзлэг, шинжилгээнд 3 жилд 1 удаа орох тухай заажээ. Мөн тавь, түүнээс дээш насны иргэнийг уушигний хорт хавдрыг эрт илрүүлэх үзлэг, шинжилгээнд жилд 1 удаа, тавь, түүнээс дээш насны иргэнийг бүдүүн, шулуун гэдэсний хорт хавдрыг эрт илрүүлэх үзлэг, шинжилгээнд хоёр жилд 1 удаа орохыг заасан байна. 


Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд eagle.mn хариуцлага хүлээхгүй.

Сэтгэгдэл бичих (0)