Их Британийн Ерөнхий сайд Борис Жонсон Европын зөвлөлтэй “Брексит”-ийн асуудлаар тохиролцож чаджээ. “The Independent” энэ талаар мэдээллээ. Еврокомиссын тэргүүн Жан Клод Юнкер “Хүсэл зориг байвал хэлэлцээр ч байна. Бидэнд байна” хэмээн мэдэгдсэн байна. Тэрээр илүү зүйл хэлээгүй ч ямартай ч гацаанд ороод байсан асуудал урагшлах нөхцөл бүрдсэн гэдгийг түүний мэдэгдэл хангалттай нотолсон юм.

Британийн Ерөнхий сайд Борис Жонсон энэ талаар хийсэн мэдэгдэлдээ “Бидэнд маш ашигтай шинэ хэлэлцээр байгуулснаар улс орноо хяналтдаа авах боломж бүрдлээ. Тиймээс Парламент “Брексит”-тэй холбоотой асуудлыг бямба гариг гэхэд дуусгаж, эрүүл мэндийг хамгаалах, гэмт хэрэгтэй тэмцэх, байгаль орчноо хамгаалах гэх мэт чухал асуудал дээрээ төвлөрч ажилллаж чадахаар болно” хэмээн онцолсон байна.

Б.Жонсон, Ж.Клод Юнкер нар. 2019.10.17.

Их Британи нь Европын холбооноос өнгөрсөн гуравдугаар сарын 29-ний дотор гарах байсан ч Т.Мэй эхлээд дөрөвдүгээр сарын 12 болтол, дараа нь энэ сарын 31 хүртэл хойшлуулаад байсан юм. Олон жил үргэлжилж, Их Британийг улс төрийн хямралын ирмэгт авчраад байсан асуудал ийнхүү шийдэгдэж, Б.Жонсон цаашид албан тушаалдаа үлдэх нь тодорхой болов.