2012 оны олимпод манай Н.Төгсцогтод ялагдаж хүрэл медаль дээр буусан орос боксчин Миша Алояны тухайн үед өгч байсан нэгэн ярилцлагыг хүргэж байна. Новосибирскийн №1 од тэрээр олимпоос хүрэл медаль хүртээд нутагтаа ирмэгцээ онгоцны буудал дээр угтсан дэмжигчдэдээ хандаж “ДАШТ-ээс авсан миний анхны медаль хүрэл байсан. Би дараа нь алт болгосон. Олимпоос авсан анхны медаль маань хүрэл байна. Үүнийг ч алт болгоно” хэмээн өгүүлж байсан билээ. Олимп, ДАШТ-ий хагас шигшээд манай Н.Төгсцогтод ялагдсан түүний Москва орж, автомашин болон бусад үнэт бэлгээ гардаад ирснийхээ дараа эл ярилцлагыг өгчээ.
-Сайн байна уу, Миша. Олимпийн наадмаас медаль хүртсэнд хожуу ч гэсэн баяр хүргэе. Хамгийн сонирхолтой сэдэв болсон олимпийн талаар шууд ярьж эхлэх үү. Тэнд, Лондонд ямар байв?
-Өмнө нь Лондонд очиж байсан болохоор олимпийн үеэр гадуур ердөө зугаалаагүй. Бүх тамирчид хамт амьдардаг гэдгээрээ олимпийн наадам их онцлогтой юм билээ. Өрсөлдөгчидтэйгөө ч цуг байрладаг.
-Өрсөлдөгчтэйгөө таарахаараа яадаг вэ. Муухай харах уу?
-Үгүй дээ, ямар рингэнд тулж байгаа биш дээ. Олимпийн наадам эхний ээлжинд их нервтэй болдог юм билээ.
-Сэтгэлзүйн тулаан болдог байх нь. Тэгвэл өрсөлдөгчөө мохоохын тулд тулааны өмнө юу хийх хэрэгтэй юм бол. Тулааны үед ч гэсэн?
-Хүчтэй, сайн тоглох л хэрэгтэй. Ер нь өрсөлдөгч сандарч байна уу гэдэг нь тулааны үед шууд мэдэгддэг л дээ. Нуух арга байхгүй.
-Буруутгаж байгаа юм биш шүү. Яагаад хүрэл гэж. Миша Алояны яг юу нь болохоо байгаад хүрэл дээр тогтчихов оо?
-Олимп дууссанаас хойш нэлээд хугацаа өнгөрлөө. Бодоод байхад сэтгэл зүйгээр л алдсан юм шиг байна. Биеийн бэлтгэлжилт бол зүгээр байсан. Гэхдээ яг тэр өдөр, наймдугаар сарын 10-нд арай тааруу байсан юм болов уу гэж. Яагаад ялагдсан бэ гэвэл хамгийн түрүүнд би өөрөө л буруутай. Дэвжээн дээр би байсан тийм болохоор би л өөрөө буруутай. Тамирчны сэтгэл зүйд ерөнхий дасгалжуулагчаас гадна хувийн дасгалжуулагч их нөлөөлдөг л дөө. Хагас шигшээ тоглолтын үед хувийн дасгалжуулагч маань миний хажууд байгаагүй. Ерөнхий дасгалжуулагч зөвшөөрөөгүй учир үзэгчийн суудалд суусан.
-Аан, тийм учиртай байж. Гэхдээ хэрвээ албан ёсоор орж болдог л юм бол ном журмаар нь орчихож болоогүй юм уу?
-Мэдүүлэг өгч болох л байсан л даа. Гэхдээ үеийн завсарлагаар зөвлөгөө өгөхөд Ерөнхий дасгалжуулагчийн үг үнэгүйдчих гээд байсан байж магадгүй. Хувийн дасгалжуулагч маань миний хувьд хамгийн шилдэг нь болохоор. Гэтэл надад тэр хүн л хэрэгтэй байсан. Намайг яаж сэргээхийг тэр л хэнээс ч илүү мэднэ шүү дээ. Гэхдээ дахиад хэлье, буруугаа өөр тийшээ чихэж байгаа юм биш шүү. Дэлхийн аваргын үеэр дасгалжуулагч маань үргэлж хамт байсан учир амжилттай тоглосон. Олимпийн хагас шигшээд тоглохын өмнө бол нэлээд догдолсон л доо. Сандарсан, нервтсэн. Тийм үед хувийн дасгалжуулагч нь л тамирчнаа хамгийн сайн ойлгоно. Тоглолтын үеэр би үнэнийг хэлэхэд яг юу хийхээ мэдэхээ байсан. Эхний үед баруун, доороос өлгөсөн цохилтууд оновчтой болж байсныг сүүлд харсан. Гэтэл хоёр гуравдугаар үед мартчихсан. Энэ үед л тэр цохилт чинь болж байна, давт гэх мэтээр зөвлөсөн бол яах ч байсан юм билээ. Тоглолт маш ширүүн болсон учир үргэлжлээд л дууссан. Харин ерөнхий дасгалжуулагч надад яавал дээр болохыг хэлж өгч чадаагүй. Баахан зодолдуулсан, гэтэл надад тэгэх хэрэг огт байгаагүй.
-Таныг автобуснаас хоцрох шахсан гэж сонссон?
-Хагас шигшээ тоглолтоос хоцрох шахсан нь үнэн. Тоглолтын хувцсаа автобусанд солих хэрэгтэй болсон. Товчхондоо ямар ч бэлтгэлгүй дэвжээнд гарсан.
-Сая олимпийн мөнгөн медалийн төлөө хийсэн тоглолт таны хувьд хамгийн хэцүү тулаан болсон байх. Үүнээс гадна сэтгэлд үлдсэн хүнд хэцүү тулаануудаасаа ярьж өгөөч?
-Нижнерючинскийн нэг хүүхэд байсан юм аа. Би түүний тоглохыг хараад л шууд финалд надтай үзэх нь дээ гэж бодсон. Тэгээд бэлтгэл дээр тоглож үзлээ. Цохилт нь үнэхээр чанга юм. Ялагдах нь л гэж бодлоо.
-Хэдэн настай байсан хэрэг вэ?
-11, 12-той л байсан. Тэгээд нөгөө хүүхэдтэйгээ шигшээ тоглолтод тулаад эхний хоёр үед хожигдож яваад сүүлийн үед дасгалжуулагчийнхаа зөвлөгөөний ачаар ялсан.Тэгэхэд “Ийм сайн хүүхдийг ялсан юм чинь боксчин болох юм байна” урамшиж байлаа. Магадгүй, ялагдсан бол би өдийд огт өөр юм хийгээд явж байх байсан биз. Харин дахиад нэг тоглолт нэрлэ гэвэл сая миний жинд олимпийн аврга болдог Робейси Рамирезийг ялсан тулаанаа нэрлэнэ.