Мэргэжлийн боксын IBF, WBC холбооны хагас дунд жингийн дэлхийн аварга Эррол Спенс авто осолд оржээ. Тэрээр өчигдөр Техас мужийн Даллас хотноо автомашин жолоодон явж байхдаа осолдсон байна. Түүний осолдож буй бичлэг өнөөдөр интернэтэд тавигджээ.
Бичлэгт Э.Спенсийн жолоодож явсан “Феррари” машин зам дээгүүр эргэлдэн онхолдож байна. Битүү дээвэртэй машин байсан бол яагаад ч амьд гарахааргүй айхтар осол харагдана. Азаар задгай дээвэртэй машин байсан тул Эррол машинаасаа шидэгдэж, ухаан алджээ. Түүнийг ойролцоох эмнэлгийн сэхээн амьдруулах тасагт хүргэсэн бөгөөд амь насанд нь аюул байхгүй гэнэ.
Энэ жил 29 настай Эррол Спенс мэргэжлийн боксын дэвжээнд 29 ялж, нэг ч ялагдаагүй бөгөөд өрсөлдөгчөө 21 удаа хүнд цохилтоор буулган авч байв.
