АНУ, БНХАУ-ын зөрчилдөөнд Үндэсний сагсан бөмбөгийн холбоо хутгалдан орлоо

Адам Силвер.

“Хьюстон Рокетс” багийн менежер Дэрил Морей өнгөрсөн баасан гаригт Хонконгийн жагсагчдыг дэмжиж, БНХАУ-ын эрх баригчдыг эрс буруушаасан үгсийг Твиттер хуудсандаа жиргэсэн юм. Тэрээр “Эрх чөлөөнийхөө төлөө тэмцэцгээ. Хонконгчуудыг дэмжээрэй” хэмээн бичсэн аж. Үндэсний сагсан бөмбөгийн холбоо бизнесийн хувьд БНХАУ-тай нягт харилцаа холбоотой. Тоглолтуудыг дамжуулснаас олдог орлогын үлэмжхэн хэсгийг БНХАУ-аас бүрдүүлдэг. Тэр тусмаа “Хьюстон Рокетс” 2002 онд Хятадын од Яо Минтэй гэрээ байгуулснаас хойд Хятадад хамгийн алдартай баг болсон байдаг. Тиймээс түүний үгийг БНХАУ-д маш эмзэгээр хүлээн авч, “Улсын дотоод хэрэгт оролцлоо” хэмээн буруушаасныг гайхах зүйлгүй. Ганц жиргээнээс болсон энэ зөрчил өнгөрсөн дөрөв хоногийн дотор “өндөр авч” хоёр тал бодитой алхамуудыг хийхэд хүргээд байна.

Дэрил Морей.

 Тухайлбал, ҮСБХ-ны тоглолтуудыг шууд дамжуулах эрхийг эзэмшдэг төрийн мэдлийн CCTV болон хувийн “Tencent Holdings” компани “Хьюстон”-ы тоглолтуудыг БНХАУ-д шууд дамжуулахгүй болсноо зарласан. Улмаар өчигдөр дахин нэг алхам ахиж, БНХАУ-д зохион байгуулагдах ёстой байсан улирал дундын хоёр ч тоглолтыг цуцалснаа зарласан юм. АНУ мөн хариу үйлдэл үзүүлж CBA /Central basketball association/ спорт хувцасны “Li Ning” брэнд, ивээн тэтгэгчээр оролцдог “Shanghai Pudong Development Bank”-тай хамтын ажиллагаагаа түр зогсоогоод байна. Энэхүү зөрчилдөөн ҮСБХ-нд санхүүгийн хувьд том алдагдал авчирч байгаа нь маргаангүй. Гэсэн ч ҮСБХ багийн менежер болон тоглогчдынхоо үг хэлэх эрхийг тууштай хамгаална гэдгээ мэдэгдээд байна.  

Яо Мин "Хьюстон Рокетс"-д тоглож байх үедээ. Тэрээр өдгөө Хятадын сагсан бөмбөгийн холбоог удирдаж буй. 

Хойд Америкийн Үндэсний сагсан бөмбөгийн холбооны комиссар Адам Силвер өчигдөр “Хонконгод болж буй хэрэг явдлын талаар үзэл бодлоо чөлөөтэй илэрхийлсэн менежер Дэрил Морейгийн талд бат зогсоно” гэж мэдэгдлээ.

Хэргийн эзэн болох Дэрил Морей өмнөх жиргээгээ устгаж, даваа гаригт “Би өрнөж буй төвөгтэй үйл явдлын талаар үзэл бодлоо л илэрхийлсэн. ҮСБХ-ны БНХАУ-ын ивээн тэтгэгч, хамтран ажиллагсдын оруулж буй хувь нэмрийг үргэлж өндрөөр үнэлж ирсэн” гэж жиргэсэн ч үйл явц маргааш нь хэрхэн үргэлжилж, ямар алхмууд хийгдсэн талаар дээр дурдсан.

"Хьюстон Рокетс" БНХАУ-д хамгийн алдартай багуудын нэг байв.

Адам Силвер хэдий менежерээ өмөөрч, үзэл бодлоо илэрхийлэх эрх чөлөөний талд багттай зогсохоо мэдэгдсэн ч өнөөдөр Шанхайд ирж байгаа бөгөөд албаны хүмүүстэй уулзаж, үнэт зүйлсээ харилцан хүндэтгэх асуудлаар ярилцах юм. Тэрээр өчигдөр энэ талаар мэдэгдэхдээ “Сая үүссэн асуудал тийм ч хурдан үгүй болохгүй” гэдгийг хүлээн зөвшөөрчээ. Үг хэлэх, үзэл бодлоо илэрхийлэх эрх чөлөө нь ҮСБХ-ны хувьд санхүүгийн хувьд маш хохиролтой болж хувирч магадгүй байна.    

---