Нийслэлийн онцгой комисс "Тавантолгой түлш" ХК-ийн байранд хуралдлаа.
Хуралдаанаар Нийслэлийн мэргэжлийн хяналтын газрын дарга Л.Эрдэнэчулуун “Аравдугаар сарын 4-ний өглөөнөөс аравдугаар сарын 8-ны 09.00 цаг хүртэл мэдээгээ нэгтгэж үзвэл Улаанбаатар хотын 43 хорооноос угаарын хийд хордсон гэх 122 иргэний дуудлага мэдээлэл бүртгэгдсэн байна.
Дүүргээр нь авч үзвэл:
Баянзүрх дүүргийн 11 хороо
Сонгинохайрхан дүүргийн 16 хороо
Чингэлтэй дүүргийн 7 хороо
Хан-Уул дүүргийн 4 хороо
Баянгол дүүргийн 2 хороо
Сүхбаатар дүүргийн 22 хорооноос нийт 61 өрх, 122 иргэн угаарт өртсөн гэсэн тоо ирсэн. Үүнээс эмнэлэгт хандаж зөвлөгөө авч гарсан 58, эмчилгээ хийлгэсэн 39, хэвтэн эмчлүүлж буй 8, гэртээ нас барсан хүний тоо зургаа байна” гэж танилцууллаа.
Хими, технологийн хүрээлэнд "Тавантолгой түлш" ХК-ийн шахмал түлшний барьцалдуулагчийн химийн үзүүлэлтийг шинжлүүлэхээр хордсон болон нас барсан айлуудын түлж байсан түлшнээс авч шинжилгээнд хүргүүлсэн хариу нь гараагүй байгаа. Өчигдрийн хувьд техникийн үзүүлэлт, барьцалдуулагчийн бүтцийн үзүүлэлтийн хариу гарсан. Химийн үзүүлэлтийн хариуг гарвал шахмал түлшний барьцалдуулагчийн иж бүрэн хариу гарна гэсэн үг юм.
Шинжилгээний дүн гарсны дараа авах арга хэмжээгээ төлөвлөх ёстой. Энэ хооронд Таван толгой түлш үйлдвэр дээр ЦЕГ-ын бие бүрэлдэхүүн, Онцгой байдлын газар, мэргэжлийн хяналтын бие бүрэлдэхүүн 24 цагаар технологийн стандартад хяналт тавьж байна.
