“Гэр хороолол” хөдөлгөөнөөс шахмал түлшний асуудлаар мэдээлэл хийлээ. Гэр хороолол хөдөлгөөний тэргүүн Б.Батсүх “Засгийн газраас хэрэгжүүлж байгаа түүхий нүүрс нийслэл рүү оруулахыг хориглон утаагүй шахмал түлшээр хангана гэсэн амлалт нь гэр хорооллын иргэдийг эрүүл аюулгүй орчинд амьдрах эрхэд ноцтой халдлаа. Цаашдаа манай хөдөлгөөнийхөн гэр хорооллын иргэдээ эрүүл, аюулгүй орчинд амьдрах амьд явах эрхийн төлөө тэмцэнэ. Анх энэ шийдвэр гарснаас хойш бид удаа дараа тэмцэж судалгаа туршилтгүй шахмал түлш хэрэглэхийг эсэргүүцэж байсан. Үүсээд байгаа нөхцөл байдалтай холбоотойгоор Засгийн газрын тэргүүн Ерөнхий сайд У.Хүрэлсүх болон хотын дарга С.Амарсайхан нарыг албан тушаалаас нь огцортол Сүхбаатарын талбайд жагсаал, цуглаан хийн улс төрийн бүхий л нөхцөлөөр төрийн сайд нартай хатуу хариуцлага тооцно гэдгээ зарлаж байна” гэв.

Гэр хороолол хөдөлгөөний ерөнхий зохион байгуулагч Я.Мөнгөнцэцэг “Гэр хорооллын иргэд шахмал түлш хэрэглэн өнөөдөр таван хүн амиа алдчихаад байхад үүнээс өөр ямар баталгаа, нотолгоо нэхээд байгаа юм бэ, дарга нар. Өнөөдөр гэхэд л Чингэлтэй дүүрэгт амьдардаг нэг иргэн “Манай шахмал түлшнээс нь тугалга шиг цагаан юм гараад, цагдаа дуудсан шалгуулж байна гээд” наашаа ирж чадсангүй.Өмнө нь туршилт хийгээгүй, нэг ч гарын авлага айл өрхүүдээ тарааж, ингэж угаартах эрсдэл бий гэж нэг ч удаа анхааруулаагүй байж өнөөдөр гэр хорооллын иргэдийг буруу галлаж түлсэн гэж буруутгаж сууна.

Шахмал түлшний бүтцийг 98 хувь нь нүүрс 2 хувь нь барьцалдуулагч гэж тайлбарлаад байгаа. Тэгвэл 98 хувь нь нүүрс юм бол юугаараа түүхий нүүрснээс ялгаатай байгаа юм бэ. Тэр 2 хувьд байгаа барьцалдуулагч бодисоо өөрсдөө ч тайлбарлаж чадахгүй байна. 220 мянган айлын амьдралаар тоглож байгаа дарга нар огцрох ёстой.Бид энэ асуудалд арга хэмжээ автал суулт зарлан дараа дараагийн арга хэмжээгээ авна” гэв.