Азийн хөгжлийн банк болон Монгол Улсын Засгийн газар өнөөдөр хилийн боомтын хүчин чадлыг нэмэгдүүлж, шинэчлэн засварлах, дүүргийн жишиг эмнэлгийн барилгын ажлыг дуусгах, авто замын их засвар, шинэчлэлтийн ажлыг гүйцэтгэх зорилго бүхий нийт 103 сая ам.долларын санхүүжилттэй төслүүдийн гэрээнд гарын үсэг зурав. Ингэснээр одоо хэрэгжиж буй хилийн үйлчилгээг сайжруулах бүс нутгийн төслийн үргэлжлэл болгон олгож буй 27 сая ам.долларын нэмэлт санхүүжилтийн хүрээнд Сүхбаатар аймаг дахь Бичигт, Увс аймаг дахь Боршоо боомтуудыг шинэчлэн сайжруулах аж. Мөн Сэлэнгэ аймаг дахь Алтанбулаг болон Сүхбаатар боомтуудын барилга байгууламж, тоног төхөөрөмжийг шинэчлэн сайжруулж байгаа юм.
Бүс нутгийн авто замыг хөгжүүлэх, засвар арчлалтын төслийн нэмэлт санхүүжилт болох 60 сая ам.долларын төслөөр Дархан – Алтанбулаг чиглэлийн 118 километр авто зам, Хүйтний хөндий – Арвайхээр чиглэлийн 58 километр авто замын их засвар, шинэчлэлтийн ажлыг гүйцэтгэж, Улаанбаатар – Дархан чиглэлийн 204 километр авто замын засвар, шинэчлэлтийг хийж дуусгах юм байна.
Мөн авто замд гүйцэж түрүүлэх эгнээ байгуулах, тэмдэг, тэмдэглэгээ, хаалт хашлага, мэдээлэх самбаруудыг байршуулах зэргээр авто замын хөдөлгөөний аюулгүй байдлыг сайжруулна. Түүнчлэн, удахгүй байгуулагдах Чингис Хаан аялал жуулчлалын цогцолбор хүрэх авто замын урьдчилсан судалгааг төслийн хүрээнд хийж гүйцэтгэхээр төлөвлөжээ.
Эрүүл мэндийн салбарын хөгжил хөтөлбөр-4 төслийн хүрээнд Сонгинохайрхан дүүрэгт баригдаж буй дүүргийн нэгдсэн эмнэлгийн ажлыг гүйцэтгэж дуусгахад 16 сая ам.долларын нэмэлт санхүүжилт зориулагдана. Энэхүү дүүргийн эмнэлэг нь эрүүл мэндийн цогц, чанартай үйлчилгээг дүүргийн иргэдэд үзүүлэхээс гадна бусад дүүргүүдэд жишиг эмнэлэг болж байгаа. Сонгинохайрхан дүүргийн эмнэлгийн барилгын ажил төлөвлөгөөны дагуу ирэх оны I улиралд дуусна.
