Мөнгө угаах, терроризмыг санхүүжүүлэхийн эсрэг жагсаалт Монгол Улс орох нөхцөл бүрдсэн гэсэн мэдээлэл бий. Саарал жагсаалт хэмээн нэгдэж буй энэхүү жагсаалтад яагаад орох болсон талаар Сангийн сайд Ч.Хүрэлбаатар өнгөрсөн долоо хоногт 2020 оны төсвийн төслийг таницуулахдаа хэлсэн юм. Тэрээр “Хамгийн гол санаа зовоож байгаа асуудал бол саарал жагсаалт. Мөнгө угаах, терроризмын эсрэг авч хэрэгжүүлж байгаа арга хэмжээнийхээ үр дүнгээр Монгол Улс саарал жагсаалтад орох эрсдэл бий. 2015 онд Эдийн засгийн ил тод байдлын тухай хуулиар маш их хэмжээний мөнгийг ил болгосон. Үүнийг олон улсын төвшинд эрсдэл гэж үзэж байгаа. Мөн арилжааны банкуудад шалгалт хийсэн шалгалтууд нөлөөлж байгаагаас гадна мөнгө угаахтай холбоотой гэмт хэргүүдийн шийдэгдсэн байдал энэ жагсаалтад оруулах үндэслэл болж байна. Энэ жагсаалтад орвол Монгол Улсын зээлжих зэрэглэл буурна, хөрөнгө оруулалт багасна, гадаадад хийгдэх валютын гүйлгээнд сөргөөр нөлөөлнө. Цаашлаад эдийн засагт муугаар нөлөөлөх эрсдэл бий” гэсэн юм.
Дээрх шалтгаанаар Монгол Улсыг саарал жагсаалтад оруулах эсэхийг хэлэлцэх Мөнгө угаахтай тэмцэх, санхүүгийн хориг арга хэмжээ хэрэгжүүлэх байгууллага (ФАТФ)-ын хурал энэ сарын 13-нд АНУ-д болох юм байна.
