“Харанга” хамтлаг 30 жилийн ойн гэнэтийн бэлгүүдээ задаллаа

Рок хөгжмийн амьд домог "Харанга" хамтлагийн 30 жилийн ой удахгүй болно. Энэхүү түүхэн ойг тохиолдуулан "Харанга 30 жил - Замд гаръя..." тоглолтыг аравдугаар сарын 19-ний өдөр 15.00 цагаас "Буянт-Ухаа" спорт цогцолборт хийх гэж байгаа талаараа өнөөдөр мэдээлэл хийлээ.

Тус хамтлагийн 30 жилийн ой энэ жил тохиож байгаа юм. Тэд 1989 онд УДЭТ-ын тайзнаа “Амьдрал” нэртэйгээр анхны бие даасан тоглолтоо толилуулснаар хамтлагийн насыг тоолдог.

Рок наадам буюу "Харанга 30 жил - Замд гаръя..." тоглолт

30 жилийн ойдоо зориулан хийж байгаа тоглолтдоо “Харанга” хамтлагийнхан 30 уран бүтээлээ тоглох нь ээ. Энэхүү тоглолтыг рок попын наадам ч гэж нэрлэж болох гэнэ. Учир нь бүтэн өдөржин үргэлжлэх энэ тоглолтод Монголын орчин үеийн шилдэг хамтлаг дуучид болох Хурд, Нисванис, Маdness, Fire, The lemons, A sound, Rec on, Lumino, “Чингис хаан” хамтлагийн ахлагч, гавьяат жүжигчин Д.Жаргалсайхан, “Никитон” хамтлагийн дуучин Б.Батчулуун, гитарчин Өөжгий, поп дива Т.Ариунаа, Б.Сарантуяа, С.Наран, дуучин Б.Чойжоо, Альтернатив Отгоо, “Киви” хамтлагийн дуучин Ука, реппер Gee зэрэг шилдгүүд оролцож ая дуугаа өргөх юм байна.

Хос пянз, цогц цомог гаргана

“Харанга” хамтлаг тэгш ойгоо угтан 1997 онд гаргасан “Эрин зууны хөг”, “Best of Haranga”, 2000 оны “Бодлын тэнгис”, 2003 оны “Ертөнцийн өнгө” цомгоо дахин хэвлүүлж, сонсогчдодоо хүргэнэ. Ингэхдээ нэг цогц цомог болгож байгаад бөгөөд 52 дуутай уг цомог тоглолтын өмнө хэвлэлтээс ирэх нь ээ. Мөн 30 жилийнхээ ойд зориулан 8 шинэ уран бүтээлээс бүрдсэн “VOLUME 1” хос пянз гаргахаар зэхээд байгаа бөгөөд хэвлэлтэд явуулжээ. Түүнчлэн баримтат нэвтрүүлэг, телевизийн реалити нэвтрүүлэг шоуг “Боловсрол” телевизтэй хамтран аравдугаар сарын 4-нөөс эхлэн үзэгчдэд хүргэнэ. Тэд  реалити нэвтрүүлэгтээ уран бүтээлээ толилуулан гэнэтийн бэлгүүдээ ч задлах юм байна.

Анхныхаа бүрэлдэхүүнээр 30 жил оршин тогтносон хамтлаг дэлхийд гарын таван хуруунд багтахаар цөөхөн

Харанга хамтлагийн ахлагч Ц.Энхманлай: Ардчиллын салхи сэвэлзэж байсан тэртээх 1989 оноос хойш 30 жил өнгөрчээ. Бидний 30 жилийн ой бол дан ганц Харангын баяр бус, Харангыг сонсдог сонсогчдын ч бас баяр. Анхныхаа бүрэлдэхүүнээр 30 жил оршин тогтносон хамтлаг дэлхий дахинд гарын таван хуруунд багтахаар цөөхөн. Манай 30 жилийн ой тоглолтод маш олон байгууллага идэвх зүтгэлтэй дэмжин оролцож байгаад баярлаж талархсанаа илэрхийлье.

Монголчууд “Харанга” хамтлагийг гурван үеэрээ сонсдог

Харанга хамтлагийн дуучин Ц.Чулуунбат: Монголыг нэг гэр бүл дээр л жишээ авч үзвэл “Харанга” хамтлагийг гурван үеэрээ сонсдог гэх мэдээлэл байдаг. Үүнийг ч бид амьдралаас мэдэрдэг. Энэ баяр бол бид бүгдийн нийт монголчуудын баяр учраас баяраа хамтаараа тэмдэглэнэ. Ой тоглолтоо "Буянт-Ухаа" цогцолборт ганцхан удаа хийнэ. Харангыг ямар дууг хэн яаж дуулах нь нууц хэвээрээ үлдэг. Харангын фен клубийн гишүүдийн саналд үндэслэн, тоглолтын хөтөлбөрөө боловсруулсан. Тоглолт маш эрт эхлэх учраас та бүхэн хоол идэж, амарч, Харангын тоглолтод зориулсан пянз, CD цомог, бусад эд зүйлсийг худалдан авах боломжтой. Тоглолтод зориулан хотын төвөөс Харангын логотой 10 том оврын автобусыг хотын төвөөс "Буянт-Ухаа" цогцолбор руу өдрийн 12.00-24:00 цагийн хооронд аялуулна. Харангын тоглолтын тасалбартай хэн бүхэн тэр автобусаар үнэгүй үйлчлүүлэх боломжтой.

Бид өнөөдөр хэдий 60 гарсан ч гэсэн бидний биологийн нас 30 шүү. Бид цаашаа 40 жилийн ойгоо хийхээр бүрэн итгэл төгс “Замд гарья...” гээд тоглолтоо нэрлэсэн. Бид цаашаа зөндөө явна. Харин бидний хурдыг гүйцнэ шүү.

 “Харанга” хамтлагийн үзэсгэлэнг дэлгэнэ

Зураач СГЗ С.Цогтбаяр: Би "Харанга" хамтлагийг сонсдог олон мянган фенүүдийнх нь төлөөлөл. "Харанга" хамтлагийн 30 жилийн болж байна. Энэ бол нийгмийн ч тэр хүний амьдралд ч тэр маш урт хугацаа. “Харанга” бол амьд домог. Нийгмээ өөрчлөх ардчиллын салхи сэвэлзэхэд, нийгмийн оюун санааны өөрчлөлтөд “Харанга” томоохон үүрэг гүйцэтгэсэн. “Харанга”-ын дууны өнгө, ая, хэмнэл үнэхээр том нөлөө үзүүлсэн. Армийн үлгэр жишээ үлээвэр найрал хөгжмийн дэргэд Соёмбо хамтлаг 1978 онд байгуулагдсан. Энэ хамтлаг нь “Харанга”-ын суурь болсон юм. “Харанга” хамтлаг олон анхны гэсэн амжилтыг эзэмшдэг. Дэлхийн стандарт нийцсэн анхны цомог, анхны видео клипийг “Харанга” л хийж байлаа. Алдар хүндээ алдахгүйгээр 30 жилийн турш тэсэж чадна гэдэг бол маш их авьяас хөдөлмөр, Аса аваргын хэлснээр “алаан” байхгүй юу. Ард түмний хайртай энэ хамтлаг маань удахгүй рок попынхны чуулсан асар том тоглолтоо хийх гэж байна. "Харанга" хамтлагийнхны тоглож байсан гитар, эд хэрэглэл, цомгийн үзэсгэлэнг бас та бүхэндээ хүргэнэ.

Тоглолтыг дэлхийн стандартад нийцүүлэн хүргэхээр ажиллаж байна

"Скин" энтертайментын найруулагч н.Анар: Энэ тоглолтын бэлтгэл жилийн өмнөөс яригдаж, тоглолтын хөгжмийн бэлтгэл он гарсаар хийгдэж эхэлсэн. Тиймээс гэнэт тоглолт хийхээр шийдсэн биш, удаан хугацаанд энэ тоглолт босож байгаа гэдгийг хэлмээр байна. Тоглолтын шийдлийг өвөрмөц хийхээр ажиллаж байгаа. Мөн хаана ч сууж үзсэн тайз үзэгчдээс хол байхгүй, нэмэлтээр тоног төхөөрөмж суурилуулж байгаа болохоор хөгжмийн дуугаралт дээр санаа зовохгүй байж болно. Тоглолтын дуугаралт бүх үзэгчдэд чанарын асар өндөр түвшинд хүрнэ. Мөн лед дэлгэцүүд тавин тоглолтыг дэлхийн стандартад нийцүүлэн асар өндөр төвшинд хүргэхээр ажиллаж байна” гэв.

"Харанга" хамтлагийн дуучин Ц.Чулуунбат:

Гучин жилийн өмнө Гэгээрлийн яамны коллеги манай тоглолтыг урьдчилж үзээд "Нийтэд тоглуулах уу, үгүй юу" гэдгийг шийдэхээр хэлэлцэж байх үед урт үстэй, савхи өмссөн, барууны үзэл суртал ханхалсан энэ тоглолтыг тоглуулахгүй байя гэдэг асуудлыг ихээр ярьсан. Тэр үед ардын жүжигчин Э.Оюун гуай,

“Өө ай даа хүний амьдрал
Эгэл жирийн боловч
Энэхэн биедээ багтахааргүй
Их хүслийн далай юм даа... ямар сайхан үгтэй дуу вэ, тоглуулъя гэдэг санал гаргасны дагуу манай тоглолт тоглогдож байсан. Тэр Э.Оюун гэдэг хүний ач хүү Анар нь өнөөдөр манай тоглолтын найруулгыг хийж байгаа нь хувь тохиол юм. 30 настай залуу өнөөдөр “Харанга” хамтлагийн 30 жилийн ойн тоглолт дээр ажиллаж байна.

"Харанга" хамтлагийн тасалбарыг ticket.mn сайтыг ашиглан дэлхийн хаанаас ч захиалж, хүргүүлэн авах боломжтой. Тоглолтын тасалбар суудал, байршлаасаа шалтгаалан 30, 40, 60 мянган төгрөгийн үнэтэйгээр зарагдаж эхэлжээ.

---