Монгол Улсын Ерөнхийлөгч Х.Баттулга БНЭУ-ын Ерөнхийлөгч Рам Натх Ковиндын урилгаар тус улсад Төрийн айлчлал хийж байна. Манай хоёр улс 1955 оны арванхоёрдугаар сарын 24-нд Дипломат харилцаа тогтоосон бөгөөд ирэх жил 65 жилийн ойгоо тэмдэглэх юм.
Ерөнхийлөгч нарын уулзалтын үеэр буддизмд суурилсан, газар зүйн байршлаас үл хамааран нягт холбогддог хоёр улс бурхны шашин номын чиглэлээр хамтран ажиллах, ялангуяа Монголын Бурхан шашинтны төв Гандантэгчэнлин хийдэд байх эртний судар бичгүүдийг цахимжуулан, илүү өргөн хүрээнд олон нийтийн хүртээл болгох ажлыг тал бүрээс нь дэмжиж ажиллах талаар ярилцсан юм.
Шашин номын харилцаанаас гадна сансар огторгуй, цахимжуулалт, кибер аюулгүй байдал зэрэг өсөн нэмэгдэж буй эдийн засгийн үр ашигтай салбаруудад хамтран ажиллах, одоогийн харилцааг өргөжүүлэх бүрэн боломжтой гэдэгтэй талууд санал нэгдсэн билээ.
Мөн БНЭУ-ын Ерөнхийлөгч Рам Натх Ковинд газрын тос боловсруулах үйлдвэр цаг хугацаандаа баригдаж, хоёр улсын хамтын ажиллагааны бэлгэ тэмдэг болно гэдэгт итгэлтэй буйгаа илэрхийлэв.
Монгол Улсын Ерөнхийлөгч Х.Баттулга: Зөвхөн нефть бус таваарын болон зорчигч тээврийг хөгжүүлэх боломжтой
БНЭУ-ын Дэд Ерөнхийлөгч бөгөөд Парламентын дээд танхим Ражяа Сабхагийн дарга Венкая Найду мөн Монгол Улсын Ерөнхийлөгч Х.Баттулгад бараалхахдаа газрын тос боловсруулах үйлдвэрийн асуудлыг өргөн хүрээнд ярилцсан юм.
Энэ үеэр Монгол Улсын Ерөнхийлөгч Х.Баттулга нефть дамжуулах хоолой барихаас илүүтэй, төмөр зам тавих асуудлаар Ерөнхий сайд Н.Модитой нэгдсэн ойлголтод хүрсэн гэдгээ хэлж, төмөр зам тавьснаар ганцхан нефть бус таваарын бүтээгдэхүүн, зорчигч тээврийн үйлчилгээ нэвтрүүлэх олон талын үр өгөөжтэй хэмээн үзэж буйгаа илэрхийлсэн юм. Улмаар Дэд Ерөнхийлөгч бөгөөд Парламентын дээд танхим Ражяа Сабхагийн зүгээс Монгол Улсын дээрх саналыг дэмжин, хамтран ажиллахыг урилаа.
Талууд мөн боловсрол, соёл, хүмүүнлэгийн болон бусад харилцааг өргөжүүлэн хөгжүүлэх асуудлаар дэлгэрэнгүй ярилцаж, санал солилцов.
Уулзалтын дараа хоёр улсын Ерөнхийлөгч нарыг байлцуулан зарим баримт бичигт гарын үсэг зурах ёслол Энэтхэгийн Ерөнхийлөгчийн ордонд боллоо.
МОНГОЛ УЛСЫН ЕРӨНХИЙЛӨГЧИЙН БНЭУ-Д ХИЙЖ БУЙ ТӨРИЙН АЙЛЧЛАЛЫН ХҮРЭЭНД ЗУРАГДСАН ЗАРИМ БАРИМТ БИЧГҮҮД:
