Эрэн сурвалжлах сэтгүүл зүйн шилдэг бүтээл шалгаруулах "Цахиур-2019" уралдааны шагналтнууд тодорлоо.
Энэ жилийн Гран при шагналыг “Өнөөдөр” сонины сэтгүүлч Х.Уянга "Дулдуйтын Равжаа дуулж явсан нутгийг харь хэлтнүүд хар тортгоор дарахаар зэхэж байна" 12 цуврал сурвалжилгаараа хүртсэн юм. Харин дэд байрт МҮОНРТ-ийн Эрэн сурвалжлах редакци "Таалийгаачдаа хайсан Монголчууд" цуврал нэвтрүүлгээрээ шалгарчээ. Уралдааны тусгай байрын шагналыг "Ийгл ньюс" телевизийн сэтгүүлч Б.Отгон "Хятадын “ДУН-ЮАНЬ” компани 4 жил хууль бусаар олборлолт явуулжээ" нэвтрүүлгээрээ хүртлээ.
Монголын эрэн сурвалжлах сэтгүүл зүйн хөгжилд хувь нэмэр оруулах, эрэн сурвалжлах сэтгүүлчдийг зоригжуулан урамшуулах энэхүү уралдаанд МҮОНРТ, "Ийгл ньюс" телевиз тэргүүтэй 20 гаруй хэвлэл мэдээллийн байгууллагын 30 орчим бүтээл өрсөлдсөн байна.
Сэтгүүлч, сэтгүүл зүйн багш, хэвлэл мэдээллийн мэргэжилтнээс бүрдсэн шүүгчдийн баг бүтээлүүдийг шүүж, шалгаруулсан юм. Ингэхдээ бүтээлд хөндсөн асуудлын ач холбогдол, үр нөлөө, мэргэжлийн хэм хэмжээ, тухайн сэдэв, асуудлыг эрэн сурвалжлахад зориулсан хүч хөдөлмөр, зоригт гол үнэлэлт өгчээ.
Хэвлэлийн хүрээлэн, ХБНГУ-ын Дойче Велле Академи хамтран Эрэн сурвалжлах сэтгүүл зүйн шилдэг бүтээл шалгаруулах "Цахиур" уралдааныг зохион байгуулдаг юм.
