Их Британи тодорхой яриа хэлэлцээр хийж нөхцөл байдлаа тодорхой болголгүйгээр Европын холбооноос өрх тусгаарлавал хоол хүнс, эм тариа, шатах тослох материалын хомсдолд орж, эдийн засагт хямрал нүүрлэх гэнэ. Их Британийн Засгийн газраас гаргасан нууц илтгэлд энэ талаар тодорхой бичсэнийг “Sunday Times” сонин олон нийтэд хүргэсэн байна. “Хөмрөг /нэгэн зүйл шувуу/ ажиллагаа” хэмээн нэрлэсэн уг илтгэлийг Сайд нарын танхим дотоодын хэрэгцээндээ зориулан боловсруулсан хэмээн “Sunday Times”-т бичжээ.
Гэрээний нөхцлийг өөрчлөх Их Британийн саналыг Европын холбоо хүлээж авахаас татгалзсаар байна.
Түүнд бичсэнээр, хэрвээ хэлэлцээр хийж тохиролцоонд хүрэхгүй бол Европын холбооноос гарсны дараа Британийн эдийн засагт дараах нөлөө ажиглагдах гэнэ. Үүнд:
-Хүнсний бүтээгдэхүүний олдоц багасч, үнэ өснө
-Британийн бүрэлдэхүүнд багтдаг Умард Ирланд болон Ирланд хилээр тусгаарлана
-Шатах тослох материалын хангамжид доголдол гарна.
-Эм эмийн бүтээгдэхүүн, түүний дотор инсулин, вакцины хэрэгцээг хангаж чадахгүйд хүрнэ
-Эх газартай /Европ/ холбогдох бүх төрлийн /Агаарын, усан замын/ тээврийн үйл ажиллагаанд доголдол, удаашрал бий болно
-Хилийн шалган нэвтрүүлэх цэгийн ажиллагаа нэмэгдсэнээр нэвтрүүлэх чадвар багасч, боомтуудын үйл ажиллагаа гурван сарын турш удаашралтай явагдана зэрэг үр дагаврыг бичжээ.
Б.Жонсон удахгүй Э.Макрон, А.Меркельтэй уулзахаар бэлтгэж байна.
Энэхүү илтгэл нь маш бодитой гэдгийг улс төр, эдийн засгийн хүрээнийхэн баталж байгаа юм байна. Ирэх аравдугаар сарын 31-ний өдөр Их Британий Европын холбоотой тохиролцоонд хүрч чадахгүй бол ийм зүйл болно. Гэхдээ дээр бичсэн нь хамгийн муу хувилбар биш, үүнээс ч дор байж болно гэж “Sunday Times” онцолжээ.
Ерөнхий сайд Борис Жонсон Европын холбоонд хандан хэлэлцээрийг шинээр эхлүүлэхийг уриалсан ч Брюссель хэлдэлцээрийн нөхцлүүдийг эргэн харахаас татгалзсаар байна. Өмнөх хэлэлцээрийг ашиггүй болсон, өөрчилнө гэж байж гарч ирсэн учир Б.Жонсонд одоо Э.Макрон, А.Меркель нарыг ятгахаас өөр арга байхгүй бөгөөд тэрээр ирэх долоо хоногт дээрх хоёртой уулзах юм.
