Төв аймаг дахь сум дундын шүүхийн Тамгын газраас Б.Хурц нарын шүүх хуралтай холбоотойгоор мэдээлэл хийлээ. Мэдээллийг тус газрын мэдээлэл хариуцсан мэргэжилтэн Б.Жавхланбаяр хийсэн юм. Тэрбээр, “Нийслэлийн прокурорын газраас энэ оны зургаадугаар сард нэр бүхий есөн хүний холбогдох маш нууцын зэрэглэлтэй хэрэг Төв аймгийн сум дундын Эрүүгийн хэргийн анхан шатны шүүхэд ирсэн. Тус хэргийн шүүх хуралдаан наймдугаар сарын 12-наас эхлэн өнөөдөр гурав дахь өдрөө үргэлжилж байна. Шүүх хуралдааны явцын талаар мэдээлвэл, шүүгдэгч болон хохирогчдоос мэдүүлэг аваад дууссан. Одоогоор гэрчүүдээс мэдээлэл авч байна. Шүүх хурал маргааш бас үргэлжлэх төлөвтэй байна. Шүүх хуралдаанд нийт 49 оролцогч оролцож байна. Энэ хэрэг нь прокурорын байгууллагаас маш нууцын зэрэглэлтэй ирсэн. Төрийн болон албаны нууцын тухай хуулийн 17.1.2-т заасанчлан 20 жилийн хугацаанд нууцална. Тиймээс шүүх хурал хаалттай үргэлжилж байна” гэсэн юм.
Үүний дараа тэрбээр сэтгүүлчдийн асуултад дараах байдлаар хариулсан юм.
-Шүүх танхимд хүмүүсийн бие муудсан тухай мэдээлэл байсан. Энэ талаар тодруулахгүй юу?
-Өчигдөр хохирогчийн өмгөөлөгчийн даралт ихэссэн. Тодруулбал, хохирогч Чимгээгийн өмгөөлөгчийн даралт ихэссэн юм. Хоёр хүн гэж гадуур яриад байгаа нь хохирогч Чимгээг хэлсэн байх.
- Та сая 49 хүн шүүх хуралд оролцож байгаа гэлээ. Шүүх танхим хэтэрхий жижиг тул хүмүүс байна гэсэн мэдээлэл оролцогчид өгч байна?
-Манай шүүх танхим 54.5 ам.метр талбайтай. Энэ шүүх ангид гурван танхим бий. Хамгийн том танхимдаа энэ шүүх хурлыг хийж байгаа. Маш нууцын зэрэглэлтэй хэрэг хэлэлцэж байгаа учраас байнга цонхоо онгойлгох боломжгүй байна. Мэдээлэл алдагдах эрсдэлтэй шүү дээ.
-Хууль зүй, дотоод хэргийн сайд Ц.Нямдорж тэргүүтэй таван гишүүн шүүх хуралд оролцох хүсэлтээ илгээсэн. Түүнийг хүлээж аваагүй. Энэ талаар тайлбар өгөхгүй юү?
-Монгол Улсын Үндсэн хуулийн 49 дүгээр зүйлийн нэгд шүүгч хараат бус байж, гагцхүү хуульд захирагдана гэж заасан. Тухайн хэсгийн хоёрт Ерөнхийлөгч, Ерөнхий сайд, УИХ-ын ба Засгийн газрын гишүүн, нам, олон нийт, бусад байгууллагын иргэн хэн боловч шүүгчийн шүүх таслах үүргээ хэрэгжүүлэхэд хөндлөнгөөс оролцож болохгүй гэж заасан байдаг. Үүнийг зөрчих хүсэлт байсан.
