Өнөөдрийн Засгийн газрын хуралдаанаар Боловсролын зээлийн сангийн талаарх асуудал болон шинжлэх ухааны салбартай холбоотой зарим шийдвэр, тогтоол гарчээ. Энэ талаар БСШУС-ын сайд Ё.Баатарбилэг мэдээлэл хийлээ.
Тэрбээр, “Боловсролын зээлийн сангаас дотоод гадаадын их дээд сургуульд суралцагчдад зээл олгодог. Энэ санд өнгөрсөн жилээс эхлэн шалгалт хийсэн. Ингэснээр холбогдох сайдад үүрэг өгсөн байдаг. Энэ мэт асуудлын дагуу ажиллсанаар өнөөдрийн Засгийн газрын хуралдаанд Боловсролын зээлийн сангийн асуудлыг орууллаа. Өнөөдөр 2004-2016 онд Боловсролын зээлийн сангаар суралцаж төгссөн дотоодын их дээд сургуулийн төгсөгчдийн зээлийг чөлөөлөхтэй холбоотой шийдвэр гарсан. Өөрөөр хэлбэл, Боловсролын зээлийн сангаас авсан гэрээний үүргээ биелүүлсэн төгсөгчдийн дипломыг чөлөөлнө. Боловсролын зээлийн санд 13 мянган иргэний диплом барьцаанд байна. Хэдийгээр зээл авч суралцсан ч гэрээнд заасан үүргээ биелүүлээд улс эх орондоо татвар төлөөд явж байгаа гэж үзэн энэ шийдвэрийг гаргалаа. Энэ нь нийтдээ 16 тэрбум төгрөг болж байгаа юм. Мөн Дээд боловсролын санхүүжилт, суралцагчдын нийгмийн баталгааны тухай хуульд заасны дагуу журмыг УИХ-д өргөн барихаар боллоо” гэсэн юм.
Түүнчлэн өнөөдөр Засгийн газрын хуралдаанаар шинжлэх ухаан, технологийн салбарт хэрэгжүүлэх тогтоол шийдвэрүүд гарчээ. Түүний нэг нь Шинжлэх ухаан, технологийн салбарт авч хэрэгжүүлэх зарим арга хэмжээний тухайд тогтоол баталсан явдал байна. Мөн шинжлэх ухааны ажилчдын нэгдсэн зөвлөгөөн зохион байгуулахаар болжээ. Мөн шинжлэх ухааны байгууллагуудыг нэгтгэх, парк байгуулах, судалгааны нэгдсэн лабораторийг бий болгох зэрэг шинжлэх ухааны байгууллагуудтай холбоотой томоохон ажил, төслийг хэрэгжүүлэхээр Засгийн газраас төлөвлөж байгаа аж.
