Зам тээвэр, хөгжлийн сайд Б.Энх-Амгалан мэдээлэл хийлээ. Тэрбээр, “Дарханы зам бол 82 жилийн настай зам. Одоогийн байдлаар энэ замыг чанар муутай, талхан дээр масло түрхсэн юм шиг зам болж байна гэж яриад байгаа. Тийм биш шүү. Суурины доод үе нь гэхэд 30 см. Цементээр бэхжүүлсэн хөрсөн суурь 20 см. Цементэээр бэхжүүлсэн буталсан чулуу нь 20 см. Асфальтан битон хучилт 10 см. Тэгэхээр 80 см зузаан зам болно. Урт настай зам болно гэж бодож байна. Дарханы зам 11 сард дуусна. Компаниудтай ийм гэрээтэй ажиллаж байгаа. Борооны улиралд замчиддаа “Ажлаа битгий зогсоорой. Ядаж карьераа ухаж, овоолго бий болго. Бэхжилтийн ажлаа гүйцэтгэ” гэж байгаа. Гэтэл нөгөө овоолсон шороог нь “Хуучин зам дээр шороо овоолж байгаад барих гэж байна” гэж яриад байгаа. Дарханы замын санхүүжилтын асуудал зөвлөх компани болооод төслийн удирдах нэгжээрээ шалгалт тавиад явсан дүнгээ гаргаж, АХБ-д мэдээлээд түүний дараа төсвөө батлуулна. Энэ бол манай дансанд орохгүй. Шууд АХБ-аас хуваарилна.” гэв. Үүний дараагаар замын явцын талаар мэдээлэл өгөв. Тус замыг хэсэгчлэн таван багц болгон замыг шинэчлэх ажлыг тус бүр өөр компани гүйцэтгэж байгаа юм.
Нэгдүгээр багц, Баруун аймгууд руу явах уулзвараас Хармодотын даваа хүртэл 37.2 км авто замын ажлын түр замын байгуулах ажлын явц 92 хувьтай байгаа бол талбайн цэвэрлэгээ 63.3 хувьтай байгаа юм байна. Одоо байгаа асфальт битон хучилтын ажил 34.8 хувьтай, замын нийт ажлын явц 20 хувьтай байна.
Хоёрдугаар багц, хоёр, дөрөвдүгээр багцын ажил удаашралтай байгаа аж. Хар модотын даваанаас өргөн хүртэл 30 км нь хоёрдугаар багцад хамаарна. Түүний хэлснээр “Энэ зам дээр бид АХБ-тай дахин хэлэлцэж, шаардлагатай бол компанийг цуцалъя гэсэн. Одоо ажил идэвхжсэн. Ажлын явц найман хувьтай байна. Үүнийг идэвхжүүлэхэд яамнаас анхаарч байгаа. Нэг, гурав, тавдугаар багцын ажил хэвийн байгаа” гэсэн юм.
Гуравдугаар багц, Урьханаас Сүмбэр хүртэл. Нийт ажлын явц 15 хувьтай байна.
Дөрөвдүгээр багц, Сүмбэрийн уулзвараас, Цайдамын хөндийг хүртэл 45 км. Замын нийт ажлын явц 5.7 хувь байна. Талбай дээр 46 ажилтан байгаа.
Тавдугаар багц, Цайдамын хөндийгөөс Дархан хүртэл 30.5 км авто зам. Нийт ажлын явц 15 хувьтай байгаа. Ажлын талбайд 68 ажилтан байна.
