Монголын үндэсний бөхийн холбооны дэд тэргүүн Ц.Магалжав мэдээлэл хийлээ.

Тэрээр “Монголын үндэсний бөхийн холбоо сэргээшний асуудалтай хатуу тэмцэж байгаа. Амжилтад яарах үзэгдэл аль ч спортод байдаг. Үүний нэг сөрөг тал нь сэргээш хэрэглэх явдал. Дэлхий нийт үүний эсрэг тэмцэж байна. 2017 онд БСШУСЯ, Биеийн тамир, спортын газар, Допингийн эсрэг үндэсний төв хамтраад “Допингийн эсрэг үндэсний хяналт-1” төсөл хэрэгжүүлсэн. Энэ төслийн дагуу 198 тамирчнаас шинжилгээ авсан. Үүний 43 үндэсний бөхийн тамирчин байсан юм. Ингэхдээ Монголын үндэсний бөхийн холбооноос баталсан дүрэм журмын дагуу шинжилгээ авсан. Тодруулбал, улс аймгийн цолтой болон аймаг, цэргийн цолтой бөхчүүдийн барилдаан, сумын цолтой бөхчүүдийн барилдаанд түрүүлж, үзүүрлэсэн, шөвгөрсөн бөхчүүдээс сэргээшний шинжилгээ авсан. Долоон бөх шинжилгээнд бүдэрсэн. Энэ залуучууд маань Баянзүрх дүүргийн шүүхэд хандсан. Энэ шүүх хуралд Монголын үндэсний бөхийн холбоог төлөөлөн зохиолч Ү.Хүрэлбаатар гуай оролцоод бөхчүүдтэй эвлэрлийн гэрээ байгуулж, сэргээш илэрсэн бөхчүүдийг барилдуулна гэсэн буруу шийдвэр гаргуулчихсан. Гадаад, дотоодын хууль дүрэм, Засгийн газрын шийдвэрийн дагуу авсан албан ёсны шинжилгээ байтал шүүх ийм шийдвэр гаргачихсан юм. Монголын үндэсний бөхийн холбоонд хамааралгүй Ү.Хүрэлбаатар гуай ийм будилаантай асуудал үүсгэчихсэн юм. Мөн шүүхийн энэ шийдвэрийн дагуу нийслэлийн шийдвэр гүйцэтгэх албанаас өнгөрсөн тавдугаар сард Монголын үндэсний бөхийн холбоонд албан бичиг илгээж шүүхийн шийдвэрийн дагуу эдгээр бөхийг барилдуулахыг шаардсан.

Дараа нь шүүх хуралд оролцсон Ү.Хүрэлбаатар гуай, сэргээш илэрсэн бөхчүүдийг дуудаж шинжилгээ авсан албаны хүмүүсээр нь тайлбар хийлгүүлсэн. Бөхчүүд маань албан ёсны шинжилгээнд хамрагдсанаа хүлээн зөвшөөрч уучлал хүсээд дархан аварга Б.Бат-Эрдэнэд өргөдөл гаргасан. Энэ өргөдлийнх нь дагуу Монголын үндэсний бөхийн холбооны Тэргүүлэгчид хуралдаад эдгээр бөхчүүддээ уучлал үзүүлээд барилдуулъя гэж шийдсэн. Тэргүүлэгчдийн найм нь барилдуулахыг дэмжсэн. Долоо нь эсэргүүцсэн. Миний бие татгалзсан санал өгсөн. Гэвч олонх нь барилдуулах нь зүйтэй гэж үзсэн учраас ийм шийдвэр гаргасан юм. Мөн нийслэлийн шийдвэр гүйцэтгэх албанаас эдгээр бөхийг барилдуулахыг шаардсан” гэлээ.