УИХ-ын Төсвийн байнгын хорооны хуралдаанаар Үндэсний аудитын газрын 2018 оны үйл ажиллагааны тайланг сонслоо. Хуралдааны эхэнд гишүүд асуулт тодруулга авч, дараа нь үг хэлсэн юм. Аудитын байгууллагын хувьд орон тоо хүн хүчний нөөц бололцоо болоод цалин хангамж бага, илүү цагаар сууж ажиллах шаардлага их байдаг ч илүү цагийн хөлс бодогддогггүй талаар хэлж байлаа.
Хэлэлцэж байгаа асуудалтай холбогдуулан гишүүд саналаа хэлсэн юм.
УИХ-ын гишүүн Б.Баттөмөр: Аудитын байгууллага бол төрийн нүд чих. Энэ байгууллагад сайн боловсон хүчин зөндөө бий. Гэхдээ нас нь өндөр болсон учир шинэ дарга хөгшин гэж гололгүй туршлага мэдлэгийг нь ашиглаарай. Би аудитын байгууллагыг үргэлж дэмжиж явдаг. Энэ байгууллага хараат бусаар ажиллах ёстой.
УИХ-ын гишүүн Ж.Мөнхбат: Баттөмөр гишүүний хэлдэг үнэн. Төрийн нүд чих шүү дээ, хуучнаар бол Ардын хянан шалгах хороо гэсэн үг. Аудитын байгууллага АСЕМ-ын шалгалтын талаар сая ярилаа. Яг үүнтэй адил Дубайн гэрээний асуудлыг танайх шалгаж болдоггүй юм уу гэж асуумаар санагддаг. Энэ гэрээний талаар улстөрчид, эдийн засагчид ярихаар попорлоо эсвэл захиалгаар ярьж байна гэдэг. Танайх энэ асуудлыг шалгасан бол шалгалтын дүнг авах хүсэлтээ гишүүний хувиар албан ёсоор илэрхийлж байна. Мөн Эрдэнэтийн 49 хувь, Хар төмөрлөгийн үйлдвэртэй холбоотой хийсэн хяналт шалгалт байна уу. Энэ талаарх мэдээллийг авмаар байна.
УИХ-ын гишүүн Д.Оюунхорол: Аудитын байгууллага 2018 онд нэлээд сайн ажилласан. Улсын төсөв болоод санхүүгийн 4104 аудит хийсэн байна. Энэ бол тооны хувьд өндөр. Улсын төсвийн зарцуулалтыг шалгаж 18.8 их наяд төгрөгийн 23500 зөрчил илрүүлжээ. Үүний 12.4 их наяд төгрөгийн 7755 зөрчлийг арилгуулсан байна. Том ажил хийжээ. Эдгээр зөрчлөөс төсөвт 28.2, орон нутагт 13.8 тэрбум төгрөгийг орлого оруулсан байна. Улсын төсөвт нэлээд хяналт шалгалт хийж байгаа. Тиймээс бид төрийн нүд, чих болсон байгууллагаа яаж дэмжих вэ. Хараат бусаар ажиллуулахын тулд ядаж илүү цагийг нь бодож олгох ёстой. Аудиторууд АТГ-ын ажилтнуудаас 51 хувиар, прокуроруудаас 80 хувиар бага цалин авч байна. Эдний ажлын байрны шаардлага маш муу, орон тоо дутагдалтай учраас гэрээгээр зарим ажлаа гүйцэтгүүлдэг. Иймд орон тоо, цалин хөлсийг бусад байгууллагатай адил хэмжээтэй байхаар уялдуулж өгөх ёстой. Байнгын хороогоор Аудитын байгууллагын тайланг хэлэлцэж байгаа энэ үед цалинг нь уялдуулах тогтоол гаргах санал гаргаж байна гэсэн юм.
Харин Байнгын хорооны дарга Б.Чойжилсүрэн тайлан сонсохтой холбоотой хууль, тогтоолын заалтыг уншиж танилцуулан боломжгүй гэдгийг хэлсэн юм. Мөн Үндсэн хуулийн өөрчлөлтийг хэлэлцэж эхлэх учир өөр асуудал чуулганы нэгдсэн хуралдаанаар хэлэлцэх боломжгүйг тодотголоо.
Ингээд Төсвийн байнгын хорооны хуралдаанаар Аудитын байгууллагын 2018 оны тайланг сонссоноор өндөрлөлөө.
