“Яг түүн шиг-4” Шоуны бүхий л зүйлсийг шилдэг байлгая гэж зорьсон
“Яг түүн шиг-2019” шоуны дөрөв дэх дугаар урд өмнө нь хэзээ ч болж байгаагүй онцлогтой болж өнгөрлөө. Учир нь найман оролцогч хоёр хоёроороо дуэт дуулж өрсөлдсөн. Эмэгтэй оролцогчид хамтарч дуулах эрэгтэй оролцогчоо харин эрэгтэй оролцогчид дуурайх дүрээ баззераар сонгосон.
Сонирхол татсан гэнэтийн бэлэг дүүрэн дөрөв дэх дугаарын ялагчаар жүжигчин Т.Бархүү, дуучин Б.Халиун нар Адам Рианна нарын дүрд хувиран “If I never your face again” дууг яг л тэдэн шиг хослон дуулж шилдгээр шалгарсан юм.
Гэнэтийн бэлэг дүүрэн “Яг түүн шиг” шоу нэвтрүүлгийн дөрөв дэх улирлын талаар Боловсрол телевизийн гүйцэтгэх продюсер Б.Энхжаргалтай ярилцлаа.
-“Яг түүн шиг” шоуны дөрөвдүгээр улирал эхэлсэн цагаасаа гэнэтийн бэлэг дүүрэн байлаа?
-“Яг түүн шиг” шоу нэвтрүүлэг нь хэд хэдэн улирал хийгдсэний дараа шилдгийн шилдгээ тодруулдаг олон улсын жишигтэй юм. Тиймээс бид дөрөв дэх улирлынхаа шоуг энэ жишгийн дагуу хийж байна. Хамгийн ойрын жишээ гэхэд ОХУ-д “Яг түүн шиг” нэвтрүүлэг дөрөв дэх улиралдаа шилдгүүдээ өрсөлдүүлээд түр хугацаанд завсарласан. Бидний хувьд ч гэсэн энэ шоугаа дуусгаад завсарлах бодолтой байна.
Бид энэ жилийн шоунд зөвхөн шилдэг оролцогчид өрсөлдүүлээд зогсохгүй продакшны ажлуудаа ч шилдгийн шилдэг байлгахыг зорин ажиллаж байна. Манай хамт олон 2016 оноос өнөөдрийг хүртэл 3 улирлын шоу хийхдээ мэргэжлийн түвшинд хөгжиж асар их туршлага хуримтлуулсан. Тиймээс энэ удаагийн шоуны тайз, гэрэл, найруулга, жижиг хэрэглэл, зураг авалт, нүүр хувиргалт гэх мэт бүх хэсэг, нэгж өмнөх жилүүдээс шат ахисан гэдгийг тодотгон хэлмээр байна.
-Оролцогчдоо хэрхэн сонгов. Хэнийг сонгох нь амаргүй даваа байсан болов уу?
-Өмнөх гурван улиралд оролцсон 24 оролцогч бүгд шилдэг уран бүтээлчид. Гэхдээ нэвтрүүлгийн дүрмийн дагуу оролцогчийн тоо хязгаартай учраас найман л оролцогчийг сонгох хүндхэн даалгавар бидэнд оногдсон. Мэдээж 3 ялагч оролцох нь тодорхой. Харин бусад оролцогчдод онооны дарааллыг харгалзан санал тавьсан юм. Харин тэдний дунд хувийн шалтгаанаар оролцох боломжгүй зарим уран бүтээлч байсан гэдгийг дурдах нь зүйтэй.
-Шүүгчдийн бүрэлдэхүүнд нэлээд том өөрчлөлт орсон. Өмнө нь нэг л шүүгч өөрчлөгдөж байсан бол энэ удаад хоёр шүүгч шинээр орж ирсэн?
-“Яг түүн шиг” шоуг Г.Ганхүү шүүгчгүйгээр төсөөлөх аргагүй. Бид нэвтрүүлгээрээ дамжуулан Монголын урлаг соёлын ертөнцийн шилдэг уран бүтээлчдийг үзэгчидтэйгээ уулзуулж, сонирхолтой шоуг бүтээхийг эрмэлздэг. Энэ удаад ч мөн зорилгоо биелүүлэхээр Монголын ард түмэндээ хүлээн зөвшөөрөгдөж хүндлэгдсэн уран бүтээлчдийг сонгохыг хичээсэн юм. Ингээд “Чингис хаан” хамтлагийн ахлагч, Гавьяат жүжигчин Д.Жаргалсайхан болон Соёлын тэргүүний ажилтан, жүжигчин О.Энхтуул нарыг ажиллуулахаар санал нэгдэн хүсэлтээ илэрхийлэхэд тун таатай хүлээж авсан. Нэвтрүүлэгт оролцогчид зөвхөн дуулж бүжиглэдэггүй мөн жүжиглэх ур чадвараа шалгуулдаг. Тиймээс жүжигчний ур чадвар талаас оновчтой үнэлэлт, дүгнэлт өгч чадах шүүгч нь жүжигчин О.Энхтуул гэдэгтэй багийнхан маань санал нэгдэж урилга хүргүүлсэн юм.
-Дөрөв дэх дугаар дээр оролцогчдыг дуэт хийн өрсөлдөнө гэж төсөөлж байсангүй?
-Энэ жилийн шоуны олон гэнэтийн бэлгийн нэг нь дөрөв дэх дугаар байлаа. Өмнөх гурван улиралд 8 оролцогч хоорондоо хослон баг болж уран бүтээл хүргэсэн тохиолдол байгаагүй. Тиймдээ ч 8 оролцогчийн хувьд хослон дуулж өрсөлдөх нь амаргүй даваа байсан болов уу. Харин үзэгчдэд маань илүү сонирхолтой, шинэлэг дугаар болсон гэж найдаж байна.
-Шоуны нэг улирал цацагдахад цаана нь хэчнээн уран бүтээлч ажилладаг вэ?
-“Яг түүн шиг” шоу үзэгчдэд цэнхэр дэлгэцээр хүрэхэд найман оролцогч, хоёр хөтлөгч, гурван шүүгч олны өмнө харагддаг. Харин тэдний ард 200 гаруй уран бүтээлч ажилладаг. Найруулагч, зураглаач, нүүр хувиргагч, жүжигчин, хөгжимчин, бүжигчин, үзэгчид зохицуулагчид гэх мэт 200 гаруй хүний хүч хөдөлмөрөөр энэхүү шоу үзэгчдэд хүрдэг.
-“Яг түүн шиг” шоунд бүжигчдийг ямар шалгаруулалтаар сонгодог вэ?
- “Яг түүн шиг” шоу нэвтрүүлгийн бүжигчид төдийгүй хөгжимчин, жүжигчин, нүүр хувиргагч гэх мэт уран бүтээлчдийг ч мөн тусгай шалгуурын дагуу сонгодог. Олон улсын шоу нэвтрүүлгүүд багаа бүрдүүлдэг хэд хэдэн шалгуур бий. Бид түүнийг дагадаг. Уран бүтээлчид нь туршлага, ур чадвар, өндөр нам, насны хувьд шоуны найруулга, тавилтад тохирох ёстой. Тиймээс найруулагчдын баг тусгай сонгон шалгаруулалт хийдэг. Энэ жилийн хувьд гэхэд л 200 гаруй бүжигчин шалгаруулалтад оролцсон.
-“Яг түүн шиг” шоуны 4-р улиралд өөр ямар онцлог байгаа бол? Үзэгчдийн хүлээлт улам их болж байх шиг санагдсан?
-Шилдгүүдийн өрсөлдөөн болж байгаа учраас шагналын сан өссөн. Нэвтрүүлгийн 9, 10-р дугаар буюу хагас финал, финалын дугаарт үзэгчдэдээ зориулсан гэнэтийн бэлэг олон бий. Энэ дугаарууд маань зургаадугаар сарын 30 болон долоодугаар сарын 7-ны өдөр та бүхэнд хүрнэ. Бид ч мөн үзэгчдийнхээ хүлээлтэд зориулан олон сонирхолтой дугааруудыг бэлтгэн хүргэхээр хичээн ажиллаж байна.
-Энэ улирлын шоуг фэйсбүүк хуудсаар Live дамжуулахаас татгалзсан байна лээ. Шоуг үзэж амжаагүй үзэгчдэд нөхөж үзэх ямар боломжууд байгаа вэ?
-Телевизийн шоуг бүтээхийн тулд маш олон хүний хүч хөдөлмөр, хөрөнгө зарцуулж байгаа учраас үзэгчдээ телевизээрээ хүлээн авч үзээсэй гэж хүсэж байна. Гадаадад байгаа үзэгчдэд “LOOK ТV”-ээр хүлээн авч үзэх боломжийг олгож байгаа. Мөн шоуг маань үзэж амжаагүй үзэгчид Univision болон Sky Media видео сангаас нөхөж үзэх боломжтой болсныг дуулгая. “Яг түүн шиг-4” шоу ням гарагт Боловсрол телевизээр цацагдсаны дараа видео санд шууд байршиж байгаа болохоор та бүхэн дуу, дүрсний өндөр чанартайгаар хүлээн авч үзээрэй. Мөн нэвтрүүлгийн давталт бямба гараг бүрийн 20.00 цагт байгааг дуулгая.
Зочин 2019/06/02
Ганхүү тэргүүтэй Цоомоо гээд орк төгсгөлтэй баахан алиалагчид .
0 0 Хариу бичихbayr 2019/06/01
ta nar humuusiin sain meddeg duuchdiig songooche meddeg duuchdaa haritsuulna bizde jilees jild muudaad bn Shu
0 0 Хариу бичих