Эсэргүүцлийн жагсаал үргэлжилж байна

Ардчилсан  намаас өнөөдөр Сүхбаатарын талбайд бүх ард түмний эсэргүүцлийн жагсаалыг зохион байгуулж байна. Тус намаас уг жагсаалыг Хариуцлага нэхэх сөрөг хүчний жагсаал хэмээн нэрлэсэн.

Засгийн газрын сайд нар авлига, албан тушаалын хэрэгт их холбогдож байгаа хэдий ч хариуцлага тооцож байгаа нь харагдахгүй байна гэж иргэд шүүмжилж байна. АН-ын дарга С.Эрдэнэ  энэ сарын 22-ны өдөр  хэвлэлийн бага хурал хийхдээ  “Ард түмнийг өмгөөлж байгаа улс төрийн хүчин АН-аас өөр алга. Эрх баригчидтай асуудлыг энэ тэнцүү ярьж, нийгэмд үүсээд байгаа хямрал, ард түмний эрх ашиг зөрчигдөж байгааг таслан зогсоох, түүнээс хамгаалах, УИХ-д хариуцлага тооцох чадвартай. Тиймээс олон түмний өмнө хүлээсэн үүргээ биелүүлж, улс төрийн тэмцлийн хэлбэрт шилжиж байна” гэдгээ мэдэгдээд байсан юм.

Энэ үеэр жагсагчид , "Иргэддээ үйлчлэх байтал хохироодог, асуудал шийдвэрлэх байтал албан тушаалын уралдаан өрнүүлдэг, хоноцын сэтгэлтэй албан тушаалтнуудын үйл ажиллагааг бид эсэргүүцэж байна. Ардчилсан Монгол Улсын иргэн Та бид өнөөдөр хувийн ашиг сонирхлоо тэргүүнд тавьж, иргэдээ хохироож байгаа албан тушаалтнуудын увайгүй үйлдлийг хараад суух ёсгүй юм. Хууль, журмыг уландаа гишгэсэн, хариуцлагагүй, ёс зүйгүй байдлыг таслан зогсоохын тулд та бид өнөөдөр жагсаж байна. Бидэнд хариуцлага нэхэх олон шалтгаан байна" хэмээн ярьж байгаа юм. 

Тус намаас өнгөрсөн дөрөвдүгээр сарын 5-ны өдөр намын  гишүүд дэмжигчдийн хамт эрх баригч намын хэрэгжүүлж буй бодлого, үйл ажиллагаа ЖДҮ-чдийг эсэргүүцэн Сүхбаатарын талбайд жагсч байсан билээ. 

Тус намаас УИХ-ын дарга Г.Занданшатарт шаардлага гардуулж өгсөн юм. Уг шаардлагыг бүрэн эхээр нь хүргэж байна.

МОНГОЛ УЛСЫН ИХ ХУРЛЫН ДАРГА ГОМБОЖАВЫН ЗАНДАНШАТАР ТАНАА

Шаардлага хүргүүлэх тухай

Монголчууд бидний ардчилалаар олсон ололт амжилтыг үгүйсгэж, тусгаар Монгол Улсын улс төр, эдийн засаг, гадаад бодлогын тулгууруудыг ганхуулж, төрийн эрх мэдэл хуваарилалтын зааг уялдааг алдагдуулан зөрчилдүүлж, Үндсэн хууль, хуульт ёсыг үгүйсгэн, өөрсдийн хувийн дур зорго, гэр бүлжсэн явцуу ашиг сонирхол, хоорондын өс хонзон, фракц бүлгийнхээ албан тушаалын төлөөх тэмцэлд ард нийтийг айдас бухимдалд автуулж, Монгол хүнийг ядууруулж, Монгол орныг дарангуйлалын зүг хөтлөх санаархал газар авхуулж байгааг Ардчилсан нам эрс эсэргүүцэж байна.

Ардчилалын тулгуур зарчмуудыг устган, уландаа гишгэхийг үл тэвчиж, Парламентын ардчилал, Үндсэн хуулийн суурь зарчим, хүний эрх, хуулийн засаглалыг хамгаалж тэмцэн,хадгалж үлдэх нь Ардчилсан намын үүрэг мөн.

60 тэрбумын гэгдэх авлигаар 65 суудал авсан эрх баригч та бүхний сонгон байгуулсан Засгийн газар Жижиг дунд үйлдвэрлэлийг дэмжих сангийн мөнгөөр Улсын Их Хурлын гишүүдийг хахуульдаж улмаар тэднээр дамжуулан хууль хулгайлах замаар хулгайгаа хариуцлагагүй, худал хуурмагаа үнэн болгож хүчирхийлэл, аллагыг өөгшүүлж ардчилалын үндэс болсон иргэний сонгох сонгогдох эрхийг хүртэл үгүйсгэн дарангуйлалыг тогтоох эхлэлийг тавилаа.

Засгийн газрын худал хийрхэл, амлалт хэрээс хэтэрч сандал суудал булаацалдсан хэрүүл тэмцэл хүний амиар хэмжигдэх хүртлээ хурцдаж байхад төгрөгийн ханш унаж, бензин тос, өргөн хэрэглээний барааны үнэ өсөж, хүнсний аюулгүй байдал алдагдаж, хоолны хордлого болон сүрьеэ өвчин тархлаа. Шоронд ч үгүй болсон өвчин сургууль эзэлж буй нь төр засгийн хариуцлага ямар хэмжээнд унасаныг шууд илтгэх биз ээ.

Иймд Улсын Их Хурлын дарга танд авлига хариуцлагагүй байдал нүүрэлсэн Засгийн газрыг дараах үндэслэлээр нэн даруй огцоруулах шаардлагыг хүргүүлж байна.

Нэгэн зүйл. Иргэд, жижиг, дунд үйлдвэр эрхлэгчдийн боломжийг хулгайлж, албан тушаалаа урвуулан нэн хөнгөлөлттэй нөхцөлөөр, их хэмжээний мөнгийг Засгийн газрын гишүүд болон Улсын Их Хурлын гишүүд, тэдгээрийн хамаарал бүхий этгээдүүдэд зохион байгуулалттайгаар тарааж, хахуульдсан.

Жич: Ийм олноороо мал адил сүрэглэн, хувийн шуналдаа өөрсдөө хээлтэн, хахуульдуулсан хууль тогтоогчид Монгол Улсын түүхэнд урд өмнө байсангүй.

Нэгэн зүйл. Олон сая долларын авлигад өртсөн сайдуудын тухай яриа өгүүлэл гадна дотноос ирдэг боллоо. УИХ-ын нэр бүхий гишүүд тодорхой тоо, дүнтэйгээр эдгээр авлигын тухай ил тод хэлж байна. Яам, агентлагуудад үйлдэл дээрээ баригдсан авлигын хэргүүд ээлж дараалан гарлаа. Тэдний цефнээс хураагдсан авлигын мөнгө нэг хүн байтугай нэг хэсэг хүн дарж алах хэмжээнд хүрсэн байна. Гэтэл авлигачид хөөн хэлэлцэх хугацаа дууссан гэх үндэслэлээр суллагдаж эхэллээ. Ингэж суллагдах авлигачдын цуваа УИХ, Засгийн газраар дүүрэн байна. Гэмт хэрэгтэй тэмцэх Үндсэн хуульд заасан үүргээ Засгийн газар биелүүлэх бус өөрсдөө гэмт хэрэг үйлдэж, гэмт хэрэгтнүүдийг хаацайлдаг болсныг хууль зүйн сайдаас авхуулаад олон сайд дарга нарын үйлдэл, ярианаас харж байна. Төрийг төгрөгөөр олигархуудад зардаг байсан 60 тэр бумын авлигчид, дүрээ өөрчлөөд улсыг доллароор гадныханд худалддаг болсон юм биш үү!

Нэгэн зүйл. Үндсэн хууль, бусад хуулийн биелэлтийг улс даяар зохион байгуулж хангах үүрэгтэй Засгийн газрыг толгойлж, төрийн хууль биелүүлэх ажлыг УИХ-ын өмнө дангаараа хариуцдаг Ерөнхий сайд, УИХ-д хэт олонхи болсон эрх баригч намын дарга нь иргэдийнхээ сонгох, сонгогдох эрхийг Үндсэн хуулийн манаачтай хамсаад хулгайлдаг явдал хоёр жил дараалан гарлаа. Давтан үйлдэгдсэн энэ гэмт үйлдэл, сонгуулиас айдаг улс төрч, ордны хуувилдаан, томилгооны эрх мэдлээр дамжин Үндсэн хуулийг хэрхэн хулгайлж, сонгогчдыг сонгох эрхгүй болгож болдгийг харууллаа.

Нэгэн зүйл. Эрх мэдэл, хулгайн мөнгөндөө сагасан эрх баригчдын архидалт яам тамгын газрыг байтугай улс орныг хөлчүүрхүүлж байна. Том дуутай, сүр ихтэй сайд дарга нар албатуудынхаа өрөө тасалгаанд архи хайж нэгжлэг хийж шоудахаас илүүтэй даргадаа эрэмшсэн тавиулуудынхаа толгой дотор архиа, авлига хоёроо хайх цаг болж. Тэдний чинь агсан согтуу хэтэрээд хүний амиар шараа тайлдаг боллоо. Яам, агентлагт хүн алдаг байснаа болиод одоо төрийн ордонд хүн үхүүлдэг боллоо.

Нэгэн зүйл. Салбар бүрт хүний амь эрсдэж байна. Амь эрсдсэн учирал бүрийн ард албан тушаалтны хариуцлаггүй байдал илэрч байна. Цэвэрлэх байгууламж, уурхай, цэрэг, цагдаа гээд үхэл дагуулсан дарга нарын хариуцлаггүй байдал У.Хүрэлсүхийн засгийн газрын ажлын тайлан мэт харагдах боллоо. Хариуцлага ярьж засгаа унагасан улс төрчид хариуцлагаа мартаад хүнээ үхүүлсээр байх уу? Үхэхээс айхгүй Ерөнхий сайд, үхүүлэхээс айхгүй сайдууддаа хэзээ хариуцлагын сэлмээ гаргаж үзүүлэх вэ? Хэлэхэд муухай ч хэлэхээс өөр аргагүй үг байна. Иргэд гадуур Хүрэлсүхийн Засгийн газар үхэл дагуулсан Засгийн газар боллоо гэж ярьцгааж байна шүү.  

Нэгэн зүйл. Ард түмнийхээ төлөө махаа барж, ясаа цайтал зүтгэж буй сайдуудын буянаар ард түмэн чинь махны бараа харахаа болиод хоосон яс чанах дээрээ туллаа. Сайд дарга нараа төгрөгийн ханш хоолонд хүрэхгүй болсныг мэдээд та бүхэн минь доллароор цалинждаг болоо юу. Дарга нарт гологдсон тэр төгрөг чинь үнийн өсөлтөөс болоод иргэддээ ч тогтохоо болилоо. Ерөнхий сайд Хүрэлсүхийн “Би ард түмнээ өмгөөлдөг, авлигачидтай хатуу тэмцдэг Ерөнхий сайд байхыг хүсч байна” гэх алдарт үг цуурай төдий үг байв уу. Үнийн өсөлт халаасны хулгайч шиг л иргэдийн халаасыг хоослоод эргүүлчихлээ.

Дарга нарын том тэрэг шатахуунаар бялхаж, эхнэр хүүхдийг нь зөөж байхад

Жирийн иргэд пруссээ түрэх нь холгүй мөлхөж байна.

Гишүүд нь 3 хувийн зээл хувааж идэж байхад

Иргэд нь 30 хувийн зээлд дарлуулж байна

Яамдын өрөөгөөр авлига тэнүүлчилж байхад

Сургуулийн танхимд сүрьеэ орогнож байна

Сайд дарга нар сархадаа хэтрүүлж, биеэ сувилуулж явахад

Салбарт нь хүн үхэж байна

Хэдий болтол мангас ярьж, иргэдээ мангасаар айлган өөрсдөө мангас болж суух вэ, эрх баригчидаа!

Архидалттай, аллагатай, авлигатай, айдастай У.Хүрэлсүхийн Засгийн газарт хариуцлага тооцон нэн яаралтай огцруулахыг шаардаж байна.

 

 

АРДЧИЛСАН НАМ

2019.05.30 


Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд eagle.mn хариуцлага хүлээхгүй.

Сэтгэгдэл бичих (10)

  1. Ардчилсан намд олигтой лидер алга. Үнэхээр хэрэггүй сөрөг хүчин болжээ.

    0 0 Хариу бичих
  2. AN novsh bolson. tarvaga, saixanbalag, baastsogt, bax erdene tiu

    1 0 Хариу бичих
  3. Хулхи худалч ЗГ Сүржин Ерөнхий сайд Согтуу УИХ бүгдээрээ Тарсан нь дээр дээ Цаашдаа ямарч Үйл ажиллагаа явуулах ямарч Чадвар чадамжгүй болчихсон байна шүү дээ одоо бүүр Төрийн ордондоо Архидан согтуурч нэгнийхээ Аминд хүрч эхэллээ шүү дээ цаашдаа бас ямарч Гэмт хэрэг гарахыг Бид Таашгүй ЗГ Огцор Согтуу УИХ Тар Сүржин худлаа Ерөнхий сайд Ажлаа өг

    0 1 Хариу бичих
  4. Ардчилсан намын удирдлага сөнөтүгэЙ 2012 оноос 2016 онд монгол улсыг барьцаалж өрөнд оруулж хувааж идсэн гэдэс нь хагартугай эд нарыг шалгаж ардчилсан намын цэвэрлэхийг шаардаж байна баахан хүүхэд залуучууд жагсаагаад ичихгүй юу ардчилсан намын удирдлага ичих нүүргүй шаарнууд

    1 1 Хариу бичих
    • АН сөнөтүгэй, Ардчилсан холбоо сөнөтүгэй. МАН бас сөнөтүгэй.

      0 0
  5. Ишш энэ Эрдэнэ ард түмний төлөө явах уу? ийм муу хүнээс яагаад ч сайн үйл гарахгүй

    1 0 Хариу бичих
  6. АН-аас Зохион байгуулж буй энэ Жагсаал Шаардлага яг Үнэндээ шал Худлаа Шоу тэр энд тэнд барьсан Лоозонгууд нь өнөө Баривчлагдсан Сахал Эрдэнэбилгээ нэн даруй Сулла гэсэн бичигтэй байна шүү дээ үүнийг хараад энэ Жагсаалын Утга учир мэдэгдэж байна шүү дээ энэ Жагсаал АН биш МАНАН--ын зүгээс Зохион байгуулж буй Жагсаал гэдэг нь тодорхой болж байна Иргэд ээ

    2 0 Хариу бичих
    • Эрдэнэбилэг буруугүй. Сулла.

      0 0
  7. Sug nam shuu ardchilsan nam

    1 0 Хариу бичих
  8. Хүрэлсүх оцгор үрэлсүх огцор ккк

    0 2 Хариу бичих