“Хятад Монголын олон улсын логистик бүс” компани байгуулах гэрээнд гарын үсэг зуржээ
“Монголын төмөр зам” ТӨХК-ийн гүйцэтгэх захирал Б.Цэнгэл энэ сарын 26-нд БНХАУ-ын Тяньжин хотноо тус улсын “Тяньжин порт” төрийн өмчит компанийн охин компани болох "Тяньжин портын эдийн засаг, техник технологийн хамтын ажиллагаа" ХХК-тай “Хятад Монголын олон улсын логистик бүс” хамтарсан компанийг байгуулах гэрээнд гарын үсэг зуржээ. Монгол Улсын далайд гарах үйл ажиллагаанд БНХАУ-аас дэмжлэг үзүүлэх, Тяньжин хотын Дунзянь боомтын эдийн засгийн бүсэд 10 га газрыг 50 жилийн хугацаатай, хөнгөлөлттэй нөхцөлөөр эзэмшүүлэхээр тусгасан санамж бичгийг анх 2009 онд байгуулсан. Мөн өнгөрсөн оны хоёрдугаар сард Зам, тээврийн хөгжлийн сайд, БНХАУ-ын Тээврийн сайд болон Тяньжин хотын Ардын засгийн газрын дарга нар 2009 онд байгуулагдсан энэхүү санамж бичгийг Монгол Улсын “Талын зам”, “Хөгжлийн зам” БНХАУ-ын “Бүс ба зам” хөгжлийн хөтөлбөрүүдтэй уялдуулж, агуулгыг баяжуулан, шинэчлэх нь зүйтэй хэмээн тохиролцож, шинэчлэн байгуулсан.
Тяньжин хотын Дунзянь боомт дахь Монгол Улсын эзэмшлийн 10 га газарт тус тээвэр логистикийн төвийг байгуулах бүтээн байгуулалтын ажлыг ирэх долдугаар сард эхлүүлэхээр төлөвлөжээ. 10 жилийн турш зогсонги байдалд байсан дээрх төсөл ийнхүү хэрэгжиж эхэлсэн бөгөөд Монгол Улс далайд гарцтай болох, цаашлаад далайн боомтоор дамжуулан гуравдагч зах зээлд гарах боломж нээгдэх эдийн засгийн ач холбогдолтой юм.
