Эверестийг зорьсон уулчдын цуваанд явсан 2 хүн нас баржээ

Өнгөрсөн лхагва гарагт сошиал сүлжээгээр Эверестийн оргилыг зорьсон уулчдын цувааны зураг цацагдаж хүмүүсийг гайхшруулсан билээ. Нийт 200 гаруй уулчин нэгэн цуваа болж явсан аж. Харамсалтай нь эдгээр 200 уулчны 2 нь 8848 метрийн өндөрт нас баржээ. Энэтхэгийн уулчин Анжали Кулкарни, АНУ-ын уулчин Доналд Линн Кэш нар уулын оргил өөд гарах замдаа амиа алджээ.  Доналд Линн Кэш уулчдын зурагчин бол Анжали Кулкарни оргил булаалдахаар явсан уулчин байсан аж.

Жилийн энэ үед дэлхийн оргил болсон Эверестийг зорих уулчдын тоо эрс нэмэгддэг бөгөөд оргил өөд чиглэсэн уртаас урт цуваа үүсдэг байна. Хималайн ноён оргилд авирах хамгийн таатай үе нь жил бүрийн дөрөвдүгээр сарын дундаас тавдугаар сарын сүүлч байдаг гэнэ. Зөвхөн энэ жилийн хувьд Хималайн уулсын 8000 метрийн өндрийг зорьсон уулчдаас 6 (сүүлчийн 2 уулчнаас гадна) уулчин нас барж, 2 уулчин сураггүй алга болоод байгаа юм. Эдмунд Хиллари, Дэнзэн Норгай нар 1953 онд Эверестийн оргилд гарснаас хойш энэ оргилыг зорих уулчдын тоо эрс нэмэгдэж, нэг төрлийн бизнес болон хөгжжээ. Хималайн бүсийнхэн нийт 381 хүнд ууланд авирах зөвшөөрлийг 11 000 ам.доллараар олгосон гэсэн албан бус тоон мэдээ байгаа юм. Цаг агаар таатай үед уулчдын тоо нэмэгдэхийн хэрээр зөвшөөрлөөс олох ашиг ч нэмэгддэг ажээ.


Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд eagle.mn хариуцлага хүлээхгүй.

Сэтгэгдэл бичих (0)