АНУ-ын Айдоха мужийн “Idaho Falls” амьтны хүрээлэнгийн Засу хэмээх ингэ төллөжээ. Энэ сарын 18-нд төрсөн ботгонд нэр хайж буй гэдгээ фэйсбүүк болон инстаграм хуудсандаа бичжээ. Энэ ботго Засу (Zasu), Гоби (Gobi) хоёрын 3 дахь төл гэнэ. Тус амьтны хүрээлэн шинэ гишүүддээ уугуул нутгийнх нь хэлээр нэр өгдөг уламжлалтай аж. Тиймдээ ч монголын хоёр бөхт тэмээний үр төлд монгол нэр өгөхөөр амьтанд хайртай хүмүүст хандсан нь энэ гэнэ.
“Idaho Falls” амьтны хүрээлэнгийн Боловсролын мэргэжилтэн Санни Катсенис “Амьтны хүрээлэнд маань шинэ төл мэндлэх бүрд бид маш ихээр баярлан хүлээн авдаг. Шинэ төлүүдэд төрөлх эх нутгийнх нь нэрийг өгөхийг чухалчилдаг. Тиймээс бид олон нийтийг манай ботгонд маш хөөрхөн монгол нэр санал болгохыг хүсэж байна” гэжээ. "Idaho Falls" амьтны хүрээлэнгийн шинэхэн ботгонд нэр хайж буй тухай постны дор Батбаяр, Бөхт, Эрдэнэ гэх мэт монгол нэрс санал болгосон байлаа. Энэ долоо хоногт хүмүүсийн бичсэн сэтгэгдэл дээрх нэрнүүдээс амьтны хүрээлэнгийнхэн тохирох нэрийг сонгох бөгөөд та ч гэсэн өөрийн хүссэн нэрийг санал болгох боломжтой. Хэрэв америк тивд мэндлэсэн бяцхан ботгонд нэр өгөхийг хүсвэл ЭНД дарж сэтгэгдэл хэсэгт бичээрэй.
Тус амьтны хүрээлэнд дэлхийн зургаан тивийн 120 төрөл зүйлийн 330 гаруй амьтантай бөгөөд тэдний гурав нь Бактриан хэмээн нэрлэгддэг хоёр бөхт монгол тэмээ юм.
