HBO-ын алдарт цуврал Game of Thrones –ийн жүжигчид үзэгч, фенүүддээ зориулан уриалга гаргалаа. Тэд тус бүтээлд бэлгэдлийн дүр зэрлэг чоно (dire wolf) буюу бодит амьдрал дээрх хаски нохдыг худалдаж авахгүй байхыг хүсчээ.
“Та манай цувралын фен, үнэнч үзэгч төдийгүй цувралд маань гардаг зэрлэг чонын дүрийг ч хайрладаг нэгэн бол хаски нохойгоор гангарах трендэд битгий нэгдээч гэж хүсэх байна” гэж GOT-ын Броннын дүрийг бүтээсэн жүжигчин Жероми Флинн уриалсан байна. Амьтны эрхийг хамгаалах PETA байгууллагынхан жүжигчин Флиннээс ийм хүсэлт тавьсан аж.
Учир нь уг цуврал анх цацагдсан 2011 оноос хойш зөвхөн Англи улсад гэхэд гудамжинд хаягдсан хаски нохойн тоо өмнөх жилүүдийнхээс даруй 420%-иар илүү гарчээ. АНУ-ын Лос Анжелес хотод орон гэргүй, хаягдсанд тооцогдсон хаски нохойн тоо 2013 онд ч өмнөх жилүүдийнхээсээ 3 дахин их гарсан гэдгийг амьтан хамгаалагчид мэдэгдээд байна.
Цуврал гарахтай зэрэгцэн хөөрсөн сэтгэлээр худалдан авч тэжээсэн гөлөг нь том болох, эсвэл нохой тэжээх сонирхол, цаг зав нь амжаагүйн улмаас тэжээвэр амьтнаа шууд гудамжинд хаях, гэрээсээ хөөх зэрэг харгис үйлдэл гаарах болсон нь үзэгчдийн сэтгэл хөдлөлөөс үүдэлтэй гэнэ. Энэ төрлийн сэтгэл хөдлөл, түүнээс үүдсэн гунигт тавилантай болсон амьтдын жагсаалт богино бишээ.
GOT цувралд Тирион Ланнистерийн дүрийг бүтээсэн Петер Динклэйж 2017 онд яг энэ сэдвээр үзэгчдийг уриалж нохой тэжээх гэдэг сэтгэл хөдлөлөөр шийддэг зүйл биш гэдгийг анхааруулахыг хичээж байсан юм. Харамсалтай нь нэр хүндтэй жүжигчид, амьтан хамгаалагчдийн гуйлт, уриалгыг үл хайхарсан олон мянган фенүүд түр зуурын сэтгэл хөдлөлдөө автан худалдан авсан нохойноосоо уйдах, дараагийн сонирхол нь гарч ирэхтэй зэрэгцэн шууд гудамжинд гаргаж хаях явдал алга болохгүй байгаа ажээ.
