“Samsung”-ийн эвхэгддэг дэлгэцтэй утас эвдэрч байгааг худалдаанд гарахаас нь өмнө зарлалаа

БНСУ-ын “Samsung” корпорац өнгөрсөн хоёрдугаар сарын 20-ны өдөр АНУ-ын Сан Франциско хотноо нугалж болдог дэлгэцтэй /Infinity Flex Display/ шинэ загварын гар утас танилцуулсан нь дэлхий даяар хүлээлт үүсгээд байгаа билээ. Тэгвэл “Samsung Galaxy Fold” хэмээх энэхүү шинэ гар утсыг худалдаанд гарахаас өмнө туршилтын журмаар хэрэглэж байсан хэрэглэгчид сэтгэл дундуур байгаагаа интернэт орчинд илэрхийлж эхэлсэн байна.

“Quartz” агентлагийн сурвалжлагч Майк Мерфи энэ сарын 17-нд Твиттер хуудсандаа энэ талаар анх бичиж, түүнээс хойш олон хүн яг адилхан нөхцөл байдлын талаар бичих болсон аж.  

“Bloomberg” агентлагийн сэтгүүлч Марк Гурман гар утасны дэлгэцнээсээ хамгаалалтын хуулгыг нь автал дэлгэц нугалагддаг хэсгээрээ эвдэрчээ. Түүний хоёр найз бас яг яг адилхан явдалтай учирсан талаар Марк Гурман бичсэн байна.

“CNBC” агентлагийн сэтгүүлч Стив Ковач, Тодд Хэселтон нарын утасны дэлгэц таллаж харласан бол блогер Маркес Браунлигийн утасны дэлгэц бүхэлдээ харлажээ. Тэрээр хамгаалалтын хуулгыг утаснаасаа салгаж авах хэрэггүй юм байна хэмээн бичсэн байв.

“Samsung” компанийнхан танилцуулгын дараа гар утсаа туршилтын журмаар хэрэглүүлэхээр өгсөн нь ийнхүү худалдаанд гаргахаас өмнө асуудал дагуулж эхэлжээ.   

 


Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд eagle.mn хариуцлага хүлээхгүй.

Сэтгэгдэл бичих (0)