Өнөөдөр Сүхбаатар дүүргийн 19 дүгээр хороо Гоодойн зусланд түймэр гарч нэлээдгүй айлуудын байр шатсан. Тодруулбал, гагнуур хийж байхдаа оч алдсан байж болзошгүй түймрийн улмаас Гоодойн зуслангийн 16 айлын байшин, хоёр гэр бүрэн шатжээ.

Хэргийн газар дээр ажилласан Улсын онцгой комиссын нарийн бичгийн дарга, хурандаа М.Энх-Амар “Иргэд холбогдох байгууллагуудаас анхааруулсаар байхад хаврын их хуурайшилтай үед шар өвс шатаах, гагнуурын ажиллагаа хийсээр байна. Урьдчилсан байдлаар Гоодойн амны 16 айлын байр, хоёр гэр шатсан. Нийслэлийн онцгой байдлын алба цаг алдалгүй түймрийн голомтод ирэн 100 метр өртөнтэй 300 метр дотор галын аюулыг зогсоон барьж чадсан. Одоогийн байдлаар энд гагнуурын ажиллагаа хийж байсан иргэдээс түймэр ассан байж болзошгүй гэсэн мэдээлэл байгаа. Онцгой байдлын шинжээчид, цагдаагийн албаныхан энэ гэмт хэргийг илрүүлж, хохирлыг тогтооно. Тиймээс ард иргэдэд ийм харамсалтай байдалд хүрэх зүйл битгий хийгээч гэж хэлмээр байна” гэв.