-Хавар эхэлснээс хойш Богд уулын дархан цаазат газарт хоёр дахь удаагаа түймэр гарлаа-

Богд Уулын Богинын аманд өчигдөр гарсан түймрийн дуудлагаар нийслэлийн Онцгой байдлын газрын алба хаагчид ажиллан, бүрэн унтраалаа.

Дуудлагын дагуу нийслэлийн Гал түймэр унтраах, аврах 14, 30, 65, 26, 29, 18, 34 дүгээр анги болон нийслэлийн Аврах анги 105-ын нийт 65 алба хаагч, 12 техник хэрэгсэлтэйгээр ажиллалаа

Богд уулын богинын аманд 6 орчим га талбайг хамарсан түймэр дэгдэж, онцгой байдлын алба хаагчид нэг цаг 30 минутын хугацаанд ажиллаж унтраалаа. Хуурайшлын зэрэг өндөр байгаа энэ цаг иргэд, аж ахуйн нэгжүүдийн хайхрамжгүй байдал галын эрсдэлийг улам бүр нэмэгдүүлсээр байна.

Тодруулбал, өчигдөр Богд уулын Богинын аманд гал гарч байна гэх эхний дуудлагыг Нийслэлийн шуурхай удирдлагын төв 11 цаг 10 минутад хүлээн авчны дагуу Хан-Уул дүүргийн болон нийслэлийн онцгой байдлын алба хаагчид ажиллалаа. Богинын ам буюу Соёмботой уулын баруун талд дэгдсэн түймэр нийт 6 орчим га талбайг хамарч, НОБГ-ын аврах, гал унтраах 14, 30, 26, 10, 63-р анги болон Нийслэлийн аврах ангийн хамтарсан 100 орчим алба хаагч, гал унтраах 10 машин, техник хэрэгсэлтэйгээр  шуурхай ажиллаж, галыг бүрэн унтраасан.

Ойн сан бүхий газарт гал түймэртэй тэмцэх, түүнээс сэргийлэх талаар хуулийг биелүүлээгүй бол хүнийг 150 нэгжтэй тэнцэх хэмжээний төгрөг буюу 150 мянган төгрөгөөр, хуулийн этгээдийг 1500 нэгж буюу 1 сая 500 мянган төгрөгөөр торгоод өнгөрдөг. Харин өчигдрийн түймрийн дэгдсэн шалтгаан буруутай этгээдийг цагдаагийн байгууллагаас хараахан тогтоогоогүй байна.

Цаг уур, орчны шинжилгээний газрын мэдээллээр энэ хавар нийт нутгаар олон жилийн дунджаас 0.5-1 градусаар дулаан байгаа. Түүнчлэн нутгийн ихэнх хэсгээр хур тунадасны түвшин олон жилийн дунджаас бага байх төлөвтэй байгаа учраас болзошгүй гал түймрийн аюулаас урьдчилан сэргийлэхийг иргэд, ААН-үүдэд байнга сануулсаар байгаа аж.