УИХ дахь АН-ын бүлэг өнөөдөр бүрэн эрхийн хугацааныхаа хамгийн сүүлчийн хурлыг хийжээ. Учир нь, тус намын бүлэг өнөөдрөөс тарж байна. Энэ талаар Д.Эрдэнэбат гишүүн мэдээлэл хийлээ.

Тэрээр "Олон сарын хугацаанд АН-ын бүлэг байх, байхгүй тухай маргаан өрнөсөн. УИХ-ын гишүүн Л.Болд АН-ын бүлгээс гарснаар УИХ-ын тухай хуулийн 28.2.13, 28.1.4, 26.1 дэх заалтууд хангагдахгүй болсон. Тиймээс АН-ын бүлэг өнөөдөр хуралдаж бүлгээ тараах шийдвэр гаргасныг мэдэгдэж байна. Мөн цаашид үйл ажиллагаа явуулах зөвлөлийнхөө дүрмийг баталлаа. УИХ дахь АН-ын долоон гишүүн зөвлөл байгуулсан тухай шийдвэрээ өнөөдөр УИХ-ын даргад хүргүүлнэ. Мөн зөвлөл байгуулсантай холбогдуулан УИХ дахь АН-ын зөвлөлийн даргын сонгуулийг зохион байгуулж Д.Эрдэнэбат миний бие ажиллахаар боллоо. Хуулийн дагуу ирэх пүрэв гаригт УИХ-ын дарга чуулганы нэгдсэн хуралдаанд эдгээр шийдвэрийг танилцуулснаар хүчин төгөлдөр болно. УИХ дахь намын бүлэг тарснаар УИХ-д сөрөг хүчний дуу хоолой сулрах эрсдэл бий болно. Хамгийн наад зах нь завсарлага авах эрхгүй болж байна. Гэхдээ бидний үйл ажиллагаа тасралтгүй хэвийн үргэлжилнэ" гэлээ.