Солонгосын цагдаа гадны иргэдийн мэдээллийг гар утсаараа шалган, саатуулах эрхтэй болжээ. Өмнөд Солонгос улсын Цагаачлалын алба нь тус улсад хууль бусаар ажиллаж, амьдарч байгаа гадаадын иргэдийн тоог багасгах төлөвлөгөөтэй ажиллаж байгаа бөгөөд Цагдаагийн газартайгаа хамтран ажиллахаар болсон байна.
Солонгосын цагдаагийн ажилтнууд нь гадуур эргүүл хийж байхдаа албаны зориулалттай тусгай гар утас ашигладаг ба уг утсанд тухайн шалгах гэж байгаа хүний регистрийн дугаарыг хийж овог нэр, гэрийн хаяг, ажлын байр гэх мэт бүртгэлүүдийг тодруулдаг ажээ.
Өнгөрсөн нэгдүгээр сарын 25-ны өдрөөс эхлэн цагдаагийн ажилтнуудын тусгай гар утсанд Өмнөд Солонгос улсад ажиллаж, амьдарч байгаа гадаадын иргэдийн мэдээлэл давхар шалгагдаж байхаар болсон нь энэ. Тодруулбал, энгийн цагдаагийн ажилтнууд ч гадаадын иргэдийн биеийн байцаалтыг утсаараа шалгаж, хэрвээ бичиг баримтын зөрчилтэй бол шууд саатуулах эрхтэй болжээ. Хоёр байгууллагын хамтын ажиллагааны дагуу өнгөрсөн сарын 26-ны өдөр Чежү арлаас Хятад улсын нэг иргэнийг саатуулсан ба тэрээр визийн хугацаагаа хэтрүүлэн барилгын салбарт ажиллаж байсан аж.
