АНУ-ын Засгийн газраас Монголд олгосон H-2 визийн эрхийг дахин нэг жилээр сунгах шийдвэр гаргасныг Элчин сайд Ё.Отгонбаяр мэдээллээ. Тус улсад ажиллах Н-2 визээр нэвтрэх эрхтэй орнуудын жагсаалтыг АНУ-ын Төрийн Департамент өнгөрсөн жил шинэчлэхдээ Монгол Улсыг оруулсан билээ.
Манай улсын иргэдэд олгож буй визний зөвшөөрөл 2019 оны 1 дүгээр сарын 17 хүртэл хүчинтэй байсан аж. Өнгөрсөн жилийн хувьд Н-2 ангиллын визээр ажиллах эхлэл тавигдаж монголчууд явсан гэдгийг АНУ дахь Элчин сайд хэлэв.
Монгол Улсад суугаа АНУ-ын Элчин сайдын яамны Тэргүүн консул Жейсон П.Спелберг "Уг визний хугацаа дээд тал нь нэг жилээр хүчин төгөлдөр мөрдөгддөг. Гэхдээ тухайн ажиллах хүчин сайн ажилласан тохиолдолд 3 хүртэлх жилээр визээ сунгаж болдог. Өөрөөр хэлбэл, визний хугацаа нь ажил олгогчийн зүгээс хэдий хугацаанд хэдэн хүн ажиллуулах хүсэлтэй байгаагаас ихээхэн хамааралтай" хэмээн ярьж байжээ.
