Эрх баригчдын талцал, зөрчил тогооноосоо хальж, төрт ёсны үйл ажиллагаа гацаад хэдийнэ 40 гаруй хоночихлоо. Засгийн газрыг огцруулах тэмцлээс эхэлсэн энэ талцал гаарч, хууль тогтоох байгууллагын даргыг огцруулахгүй бол хуралдаа суухгүй гэсэн хэсэг бүлэг гишүүд “ажил хаяж”, түүнийгээ гавьяа мэтээр олон нийтийн сүлжээ, хэвлэл мэдээллийн хэрэгслээр төлбөртэй, төлбөргүй цацаж байх.

Уг нь тэд ард түмний мандатаар төрийн түшээ болсон юм. Төр төлөөлөх эрхээ иргэд дөрвөн жил бариулж, өөрсдийнхөө өмнөөс бодлого шийдвэр гаргуулах үйлсэд хувь нэмэр оруулахаар илгээсэн болохоос албан тушаал эрх мэдлийн төлөөх тэмцлийг буухиалаарай гээгүй нь хэнд ч ойлгомжтой байгаа билээ.

Төрийн энэ гацаа нэг талаараа эрх баригч МАН-д үүссэн “хайнааг” бүх ард түмний эв нэгдлийн илэрхийлэл болсон Ерөнхийлөгч хагалахаар хууль санаачилсан гэх мессэж олон нийтийн сүлжээгээр хөврөх болов. Ерөнхийлөгч хууль санаачлах эрхтэй юу гэвэл эрхтэй. Гэхдээ хэлэлцэх эсэхийг нь УИХ, түүний бүтцийн байгууллага болох Байнгын хороод шийддэг.

Ерөнхийлөгчийн өргөн мэдүүлсэн хоёрхон заалттай хуулийн нэмэлт өөрчлөлт батлагдвал УИХ-ын гишүүдийн олонх нь дэмжсэн тохиолдолд УИХ-ын даргыг огцруулах эрхзүйн үндэслэл бүрдэх юм.

Эрхээ эдэлсэн Ерөнхийлөгч маань УИХ-ын чуулганы хуралдааны дэгийн тухай хуульд нэмэлт оруулах тухай төслийг УИХ-д өргөн барьчихлаа. Угтаа бол М.Энхболдыг огцруулах төслийг өөрт нь өргөн мэдүүлсэн гэсэн үг л дээ. УИХ-ын дарга М.Энхболд хуулийн төслийг хүлээн авсан даруйдаа хэлэлцэх эсэхийг нь шийдүүлэхээр Төрийн байгуулалтын байнгын хороонд хуваарилаад байгаа. Уг хуулийн төслийг УИХ-ын даргын дэргэдэх зөвлөл хэлэлцэх асуудлын дараалалд багтааж, өнөөдрийн Төрийн байгуулалтын байнгын хорооны хуралдаанаар хэлэлцэхээр болоод буй юм.

Энэ төсөл Байнгын хорооны босго давах нь тун эргэлзээтэй. Учир нь, тус Байнгын хороонд 19 гишүүн харьяалагддагийн 10 нь М.Энхболд даргын талд байгааг У.Хүрэлсүхийн Засгийн газрыг огцруулах эсэх асуудлыг тус Байнгын хороогоор хэлэлцэх үед санал өгсөн гишүүдээс харж болох биз ээ. Төсөл Байнгын хорооны босго давахгүй байх магадлал өндөр ч УИХ Байнгын хорооны дэмжээгүй саналаар санал хураалгах хуулийн дэгтэй.

Ерөнхийлөгчийн өргөн мэдүүлсэн хоёрхон заалттай хуулийн нэмэлт өөрчлөлт батлагдвал УИХ-ын гишүүдийн олонх нь дэмжиж гарын үсэг зурсан тохиолдолд УИХ-ын даргыг огцруулах эрхзүйн үндэслэл бүрдэх юм.

Энэ асуудлаар УИХ дахь хоёр намын бүлгийн дарга нар байр сууриа илэрхийлсэн юм. УИХ дахь АН-ын бүлгийн дарга Д.Эрдэнэбат “Энэ хуулийг УИХ зайлшгүй хэлэлцэх ёстой юу гэвэл хэлэлцэх ёстой. Энэ хуулийн төсөлд дутагдалтай зүйл байгаа юу гэвэл байгаа. Энэ нь юу вэ гэвэл, УИХ-ны дархлаа суларчих вий гэсэн болгоомжлол байна” гэсэн бол МАН-ын бүлгийн дарга Д.Тогтохсүрэн “Хуулийн төслийг чуулганы хуралдаанаар хэлэлцэх үед гишүүд хуралдаа сууна гэж байгаа. Энэ асуудлаар манай намын бүлэг хуралдаж, нэгдсэн шийдэлд хүрэх шаардлагатай байна” гэсэн юм.

Энэ хуулийн төслийг хэлэлцэхээс өмнө М.Энхболд, У.Хүрэлсүх хоёр “эвлэрч” буюу тохирч чадвал заавал хэлэлцэх шаардлагагүй гэх байр суурьтай гишүүд ч байгаа юм. Ямартай ч Байнгын хороо хуралдах эсэхээс МАН дахь талцал, зөрчил аль талд гарч шийдэгдэхээр буйг харж болохоор нөхцөл байдалд байна.