Мэдээ мэдээллийн еagle.mn сайт долоо хоног бүр “Нэг км-т” цуврал сурвалжлагаа  уншигч танд хүргэж байгаа билээ. Эхний дугаартаа бид  Баянзүрх дүүргийн 7, 8 дугаар хороо буюу Зүүн дөрвөн замын уулзвараас  Сансрын  аюулгүйн тойрог хүртэлх зайд хийсэн "Нэг км замд 42 ломбард" сурвалжлагаа  хүргэсэн.  Өнгөрсөн долоо хоногт Хүннүгийн гудамж буюу Баянзүрх дүүргийн 26 дугаар хороонд байрлах "Home Plaza" дэлгүүрийн уулзвараас Дүнжингарав худалдааны төвийн уулзвар хүртэлх зайд "Нэг км зайд 19 хотхон, хороолол"  сурвалжлагыг бэлтгэсэн.

Энэ удаад Чингэлтэй дүүргийн Худалдааны гудамж дагуу хэдэн эмийн сан, эмийн бөөний худалдааны төв байрладаг талаар сурвалжиллаа. Бидний нэрлэж заншсанаар Шар дэлгүүрээс Бөмбөгөр худалдааны төвийн баруун тал буюу Их тойруу хүртэлх нэг км замд нийтдээ 53 эмийн сан, эмийн бөөний худалдааны төв хаяа дэрлэн үйл ажиллагаа явуулах аж.

Эрүүл мэндийн хөгжлийн төвийн лавлахаас нийслэл болон улсын хэмжээнд үйл ажиллагаа явуулж байгаа эмийн сангуудын тоон мэдээллийг тодруулахад "Нийслэлийн хэмжээнд хэчнээн эмийн сан үйл ажиллагаа явуулж буйг Нийслэлийн эрүүл мэндийн газар мэднэ. Орон нутагт тухайн аймгийн эрүүл мэндийн газарт тоон мэдээлэл байгаа. Манайх улсын хэмжээнд хэдэн эмийн сан үйл ажиллагаа явуулж байгааг нэгтгэдэггүй" гэх хариу өглөө.

-Нийслэлд 1100 эмийн сан үйл ажиллагаа явуулдаг-

Эмийн сангийн үйл ажиллагаа явуулах тусгай зөвшөөрлийг хэрхэн авдаг талаар НЭМГ-ын Эмийн асуудал хариуцсан мэргэжилтэн Д.Болдбаатараас тодрууллаа.

-Нийслэлд хэдэн эмийн сан үйл ажиллагаа явуулж байна. Эмийн сангийн үйл ажиллагаа эрхлэх тусгай зөвшөөрлийг хэрхэн олгодог вэ?

-Өнөөдрийн байдлаар 1100 эмийн сан үйл ажиллагаа явуулж байна. Эрүүл мэндийн чиглэлээр мэргэжлийн үйл ажиллагаа явуулах тусгай зөвшөөрөл олгох эрхийг нийслэлийн комиссын хурлаар шийддэг. Тусгай зөвшөөрлийг улиралд нэг удаа материал авч, хоёр шатны комиссын хурлаар оруулж шийддэг. Хамгийн сүүлд өнгөрсөн долдугаар сард болсон комиссын хурлаар 50-60 эмийн санд үйл ажиллагаа эрхлэх тусгай зөвшөөрөл олгосон.

-Энэ тоонд эмийн бөөний худалдааны төвүүд багтсан уу?

-Эмийн бөөний худалдааны төвийн зөвшөөрлийг Эрүүл мэндийн яамнаас олгодог. Бид жижиглэнгээр эм борлуулдаг эмийн сангийн тусгай зөвшөөрлийг олгодог болохоор бөөний төвүүд дээрх тоонд багтаагүй.

-Тусгай зөвшөөрөл хэдэн жилийн хугацаатай байдаг бол. Эрх дуусан тохиолдолд хэрхэн сунгадаг вэ?

-Эмийн сан ажиллуулах буюу эрүүл мэндийн чиглэлээр мэргэжлийн үйл ажиллагаа явуулах тусгай зөвшөөрлийг гурван жилийн хугацаатай олгодог. Тусгай зөвшөөрлийн эрх дуусахаас нэг сарын өмнө манайд мэдэгдэн бид Нийслэлийн мэргэжлийн хяналтын газраас тодруулга авч, ажлын хэсэг газар дээр нь очиж үзээд тусгай зөвшөөрлийг нь сунгах эсэхээ шийддэг.

Сонирхуулахад, импортын эмийн үнэ өсдөг шалтгаан нь валютын ханш гэж мэргэжлийн байгууллага тайлбарласан. Манай эмийн зах зээл жилдээ 400 орчим тэрбум төгрөг гэж үзэж болно. Импортын үнийн дүнгээр 477 тэрбум, борлуулалтыг нь харвал 400 орчим тэрбум төгрөгийн эм өнөөдөр Монголын зах зээлд борлуулагдаж байгаа. Энэ 400 тэрбум төгрөгийн эмийн 1/4 хувьд шууд, 3/4 хувьд нь шууд бус зохицуулалт хийдэг байна. Мөн эмээс авдаг онцгой албан татварын хэмжээ ч үүнд нөлөөлдөг гэлээ.  Учир нь Монгол Улсын хилээр эм оруулж ирэхэд гаалийн онцгой татварт 15 хувийг төлнө. Үүний дараа бөөний худалдааны төвүүдээр дамжихдаа 30 хүртэлх хувь, эмийн сангууд 30 хүртэлх хувийн нэмэгдэлтэйгээр борлуулдаг учраас иргэдийн гар дээр ирж байгаа үнэ өндөр тусдаг юм байна.