“Автотээврийн үндэсний төв” ТӨҮГ-аас 2018 оныг “Үйлчилгээний чанарыг сайжруулах жил” болгон зарласантай холбогдуулан 3-р улирлын байдлаар хийж хэрэгжүүлсэн ажлаа дүгнэж, тайлангийн хурлаа хийлээ. Мөн ажилтны нийгмийн баталгааг хангах хөтөлбөрийг хэрэгжүүлэх журмыг танилцуулж, ажилтны цалин хөлс, тэтгэвэр урамшууллын талаар мэдээ мэдээлэл өгч, цаашид хийж хэрэгжүүлэх ажлуудынхаа талаар зөвлөлдлөө.

Тайлант хугацаанд техникийн хяналтын үзлэгт хамрагдсан 482628 тээврийн хэрэгсэл байгаа нь өнгөрсөн оны мөн үеэс 7 хувиар өссөн үзүүлэлт юм. Улсын хэмжээнд баруун талдаа хүрдтэй 10 мянга гаруй тээврийн хэрэгслийн гэрлийн тусгалыг өөрчилсөн талаарх мэдээллийг тус үйлдвэрийн газрын захирал Ш.Батсайхан энэ үеэр танилцууллаа.

Мөн хот хоорондын зорчигч тээврийн үйлчилгээг 59 аж ахуй нэгж, 74 чиглэлд 966 тээврийн хэрэгсэл, 1250 мэргэшсэн жолоочтойгоор тээвэрлэлт гүйцэтгэж, тайлант хугацаанд 2060 мянган зорчигч тээвэрлэсэн нь өмнөх оны мөн үеэс 11 хувиар өссөн үзүүлэлт юм. Харин улс хоорондын 11 чиглэлд 317 аж ахуй нэгж байгууллага 14232 хүнд даацын автомашинаар 26,8 сая тонн ачаа тээвэрлэжээ.

Мөн 11763 хүн мэргэшсэн жолоочийн шалгалтад хамрагдсанаас 6961 жолооч тэнцсэн байна. Хөдөлгөөний удирдлагын чиглэлээр улс, хот хоорондын нийтийн зорчигч тээврийн 133233 удаагийн тээвэрлэлтийг хянаж, шуурхай зохицуулалт хийжээ. Түүнчлэн 1900-1234 лавлах утсанд 200 мянга орчим дуудлага хүлээн авч, мэдээлэл өгсөн байна.

Тайлант хугацаанд шинээр 70140 тээврийн хэрэгсэл шинээр бүртгэгдэж, 240 мянган тээврийн хэрэгсэл шилжилт хөдөлгөөн хийлгэсэн байна. Авто үйлчилгээний мэдээллийн санг ашиглалтад оруулж, 230 аж ахуй нэгж, иргэний 2500 гаруй засварын түүхийг үүсгэсэн тухай танилцууллаа.

Цаашид тус үйлдвэрийн газраас тээврийн хэрэгслийн ашиглалтаас үүдэн гарах хог хаягдлыг авто засварын үйлчилгээ эрхлэгчидтэй хамтран ажиллах, үйлчилгээний төлбөр хураамжийг цахимжуулж, үйлчилгээний хүртээмжийг сайжруулах зорилгоор  мэдээллийн нэгдсэн сангийн аппликэйшн боловсруулах, дотоодын ачаа тээврийн нэгдсэн системийг боловсронгуй болгож, ачаа барааг цахим хэлбэрээр захиалах, хүлээн авч бүртгэлжүүлэх, нэгдсэн зохион байгуулалтад оруулах зэрэг ажлуудыг шат дараатайгаар хийж гүйцэтгэхээр төлөвлөөд байгаа аж.