Д.Амарбаясгалан: МАН нөхөн сонгуульд оролцох асуудлыг 100 хувь дэмжлээ

Монгол Ардын намын Бага хурал Тусгаар тогтнолын ордонд өнөөдөр эхэллээ. Хурлаар ямар асуудал яригдсан талаар МАН-ын Ерөнхий нарийн бичгийн дарга Д.Амарбаясгалан мэдээлэл хийлээ.

“МАН-ын ээлж ит хоёрдугаар Бага хурал өнөөдөр Тусгаар тогтнолын ордонд болж байна. Бага хурал 200 гишүүн буюу 53,5 ирцтэйгээр өнөөдрийн Бага хурлаа эхлүүллээ. Бага хурлаараа бид хоёр асуудал хэлэлцэхээр намын удирдах зөвлөлөөрөө шийдвэрлэсэн байгаа. Нэгдүгээрт 42 дугаар тойргийн нөхөн сонгуульд оролцох эсэх асуудал, хоёрдугаарт нэр дэвшүүлэх журмыг Монгол Улсын Сонгуулийн хуульд нийцүүлж шинээр баталдаг хуультай. Үүнийгээ батлахаар төлөвлөж ажиллаж байна.

Бага хурал, нөхөн сонгууль болохтой холбоотойгоор Үндсэн хуулийн цэц СЕХ, аудитын байгууллагатай бид холбогдож, цэц дээр үүссэн маргаан болон бусад асуудалтай холбогдуулан сонгуулийн үйл ажиллагааг хэвийн явуулах эсэх талаар тайлбарыг өнгөрсөн долоо хоногт бид холбогдох байгууллагуудад хандаж гаргуулж авсан.  Түүний дагуу өнөөдөр бага хурал болж байгаа. Бага хуралд Намын дарга 42 дугаар тойргийн нөхөн сонгуульд нэр дэвших асуудлыг танилцуулсан. Бага хурлын гишүүдийн 100 хувийн саналаар нэр дэвшүүлэн оролцох нь зүйтэй гэсэн шийдвэрийг гаргалаа гэдгийг та бүхэнд мэдээлье. Нэр дэвшүүлэх бага хурал хуульд хуульд заасан хугацаагаараа есдүгээр сарын 4-ний дотор хуралдаж батлахаар байгаа. Бид маргаашнаас эхлэн СЕХ-нд бичиг баримтаа бүрдүүлж өгөн сонгуульд оролцохоо илэрхийлээд явна.

Хоёрдугаарт, МАН нам гэхээс илүү улс төрчдөд итгэх итгэлгүй болсон энэ үед энэ намын 2016 оны ялалтын үр дүнгээр намын гишүүдийн ёс зүйг шат шатандаа хариуцлага алдсан эсэх судалгааг дүгнэж хариуцлага тооцох ёстой.

Ганц 60 тэрбумын гэх асуудлаас гадна намын гишүүний хариуцлага алдсан тохиолдолд хариуцлага тооцох хэрэгтэй гэж үзлээ" гэв.

Тэрээр сэтгүүлчдийн асуултад хариуллаа.

-Хяналтын ерөнхий хорооны шийдвэрийг энэ удаагийн Бага хурлаар хэлэлцэх үү?

-Хяналтын ерөнхий хороо өнгөрсөн баасан гаригт хуралдсан байсан. Одоогийн байдлаар хурлын талаарх албан ёсны баримт бичгээ ирүүлээгүй байна. Бидний зүгээс тэрхүү шийдвэрийг гар дээрээ авсны дараа Удирдах зөвлөл, Бага хурлаа хуралдуулна. Ер нь өнөөдөр монголын нийгэмд улс төрийн нам улс төрчдөд итгэх итгэл буурсан цаг үед нам хэрхэн ажиллаж, ард иргэдийн итгэлийг сэргээх вэ гэдэг дээр гол анхаарлаа хандуулж ажиллаж байгаа. Энэ хүрээнд намаас сонгогдсон, томилогдсон нөхдүүдийн ёс зүй, намын мөрийн хөтөлбөрөө хэр зэрэг хэрэгжүүлж байна вэ гэдэг дүгнэлтийг шат шатандаа гаргаад явах ёстой. Хэдийгээр бид чөлөөт нийгэмд ажиллаж амьдарч байгаа ч улс төрийн намын гишүүн бол дүрэмд захирагдах ёстой.

-Хэнтий аймгийн 42 дугаар тойрогт ямар хүн нэр дэвшүүлэх урьдчилсан таамаг байна вэ?

-Бид Хэнтий аймгийн 42 дугаар тойрогт судалгаа хийж байгаа. Манай намаас төрийн түвшний, орон нутгийн түвшний, улс төрийн намын түвшний хэд хэдэн боломжит хүмүүс бий. Гэхдээ нэр дэвшүүлэх ажил есдүгээр сарын 4-нд болно. Тэрнээс өмнө бид судалгаа мэдээлэлд тулгуурлаж, ялалт байгуулах боломжтой хүнийг нэр дэвшүүлнэ.

-Бага хурлын гишүүнээс чөлөөлөх асуудлыг намын дүрмээр хэрхэн зохицуулсан байдаг вэ?

-Бага хурлын гишүүнээс гарсанд тооцох хэд хэдэн заалт байдаг. Нэгдүгээрт, хуралдаа идэвхтэй оролцох ёстой. Хоёрт, Бага хурлын гишүүнийхээ татварыг цаг хугацаанд нь төлөх ёстой. Гуравт, Бага хурлын гишүүн болсны хувьд намын нэр хүндийг өндөрт өргөж, ажилдаа хариуцлагатай хандах зэрэг шаардлагыг тавьдаг.

-Бага хурлыг энэ удаад УИХ-ын гишүүн, Шадар сайд Ө.Энхтүвшин удирдан явуулах бол орлогч даргаар нь Хэнтий аймгийн Засаг даргын орлогч н.Хэрлэнчулуун ажиллах болж, гишүүд нь дэмжлээ-

 

 

 

 

 


Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд eagle.mn хариуцлага хүлээхгүй.

Сэтгэгдэл бичих (1)

  1. Зөв зөв, 60 тэрбумын болон бусад хүнд гарууддаа хариуцлага тлоцох хэрэгтэй

    0 0 Хариу бичих