Ц.Энхжин: Бүхий л нөөц бололцоогоо шавхан оролцсон болохоор надад харамсах зүйл байхгүй

67 дахь удаагийн “Дэлхийн мисс” тэмцээнд амжилттай оролцсон Ц.Энхжин өнөөдөр эх орондоо ирлээ. Тэрээр “Дэлхийн мисс” тэмцээний гурван шалгаруулалтын ялагчаар тодорч, шилдэг 15 миссийн нэг болсон юм. Түүнчлэн

1.Head to Head challenge-д группийн ЯЛАГЧ,

2. Дэлхийн мисс шилдэг "Шөвгийн 15 оролцогч",

3. Ард түмний сонголт номинацийн "Ялагч",

4. Дэлхийн бүжиг "Топ-5",

5. Мисс спорт "Топ-8",

6. Зорилго бүхий мисс "Топ-20",

7. Мисс Фашион-топ модел "Топ-30" оролцогчийн нэгээр шалгарсан нь өмнөх оролцогчдын рекордыг эвдсэн билээ.

-Ц.Энхжин: "Mongolia" гээд хамгийн эхэнд нь дуудахад  маш их баярлаж, бас огшиж омогшсон-

Ц.Энхжин ээж аавынхаа хамт 15.00 цагт "Чингис хаан" олон улсын нисэх буудалд газардаж, хэвлэлээр дамжуулж дэмжиж тусласан бүх хүмүүст баярласнаа илэрхийллээ. Энэ үеэр түүнтэй цөөн хором ярилцсанаа хүргэе.

-“Дэлхийн мисс”-ийн тайзан дээр эх орныхоо нэрийг тодоор дуудуулж, бахдам амжилттай ирсэн танд баяр хүргэе?

-Монголчууддаа маш их баярлалаа. Намайг чин сэтгэлээсээ дэмжсэн, хамтран ажилласан байгууллагууд болон багийнхандаа гэр бүлийнхэндээ найз нөхөд ажлынхандаа маш их талархлаа.

-67 дахь удаагийн “Дэлхийн мисс” тэмцээний титмийн эзэн болсон Энэтхэг улсын мисссийн тухайн яриач. Шалгаруулалтын үеэр та түүнтэй эн зэрэнцэн өрсөлдөж байсан шүү дээ?

-Бид гурван саяулаа мөртлөө 30 сая хүн амтай, 1 тэрбум хүн амтай улсын миссүүдтэй эн зэрэгцэж өрсөлдөж чадлаа. Бүр гурван ч шагналын эзэн боллоо. Энэ бол маш том амжилт гэж би бодож байна.

-Цаашид “Дэлхийн мисс” тэмцээнд цаашид эх орноо төлөөлөн оролцох миссүүд юун дээр илүү анхаарах ёстой юм шиг санагдсан бэ?

-Дараагийн миссүүд маань эртнээс бэлтгэлдээ орох хэрэгтэй. Монголынхоо амжилтыг ахиулахын тулд дараагийн миссээ маш сайн сойж, өөрийн зүгээс хувь нэмрээ оруулна.

-Та долоон шалгуурын зургаад нь амжилттай оролцсон. Өөрийнхөө зүгээс “Энэ шалгаруулалтад арай дутуу бэлдэж дээ эсвэл энэ дээр ингэчихсэн бол” гэж бодогдож байв уу?

-Би тэмцээндээ өөрийнхөө бүхий л хүч чадлаа дайчилж оролцсон. 24 жилийн туршид өөрийгөө хөгжүүлсний үр дүн маань гарлаа. Тиймдээ ч долоон шалгуурын зургаад нь шилдэгт шалгарч чадсан. Би өөрийгөө бүрэн дайчилсан болохоор харамсах зүйл байхгүй ээ.

-Шилдэг 15 миссийн хамгийн түрүүнд “Монгол” гээд дуудахад танд ямар сэтгэгдэл төрсөн бэ?

 -Шилдэг 15-д үлдэнэ гэдэгтээ итгэлтэй байсан ч хамгийн эхэнд дуудагдана гэж бодоогүй. Хамгийн эхэнд нь дуудахад нь маш их баярлаж, бас огшиж омогшсон.

-Б.Цэвээндаш: Охин маань “Жалам хар” бүжгийг гоцлон бүжиглэхэд Монгол хүн болсноороо бахархаж суулаа-

Ц.Энхжингийн ээж болон аав ОУХМ Б.Цэвээндаш нь БНХАУ-д очиж 67 дахь “Дэлхийн мисс” тэмцээний финалын шалгаруулалтын үзэж, өнөөдөр охинтойгоо хамт эх орондоо ирсэн юм. Тэрбээр "Охин маань нэг сарын турш буюу богино хугацаанд бэлдсэн ч өндөр амжилт үзүүлсэнд их баяртай байна. Дараа дараагийн миссүүдээ амжилттай оролцуулахын тулд жил бүрийн нэгдүгээр сард Монголын мисс шалгаруулах тэмцээнээ зохион байгуулах нь зөв юм байна.

Охиноороо, Монголчуудаараа маш их бахархлаа. Өвөг дээдсээрээ, Монгол хүн болж төрснөөрөө их омогшлоо. Та бүхэнд бүгдэд нь их баярлалаа. Охин маань “Жалам хар” бүжгийг гоцлон бүжиглэхэд нулимс урсаж, огшиж Монгол хүн болсноороо бахархаж суулаа" гэлээ.

-Н.Долгорсүрэн: 130 сая хүн амтай Мексик, 30 сая хүн амтай Непал, 70 сая хүн амтай Индонез улсуудын миссийг манайх ялсан-

Түүнийг Чингис хаан олон улсын нисэх онгоцны буудалд газардахад гэр бүлийнхнээс нь гадна Ц.Энхжингийн арын албыг хариуцан ажилласан багийнхан нь тоссон юм. Энэ үеэр “Дэлхийн мисс” 2017 тэмцээний оролцогч Ц.Энхжингийн арын албыг хариуцаж, зохион байгуулсан Н.Долгорсүрэн “Бид богино хугацаанд төлөвлөгөөний дагуу зохион байгуулалттай ажиллалаа. Залуучууд маань сошиалаар маш сайн дэмжлээ. 130 сая хүн амтай Мексик, 30 сая хүн амтай Непал, 70 сая хүн амтай Индонез улсуудын миссийг манайх ялж чадсан.

Цаашид ард түмний хөдөлгөөн болгоод нийтээрээ “Дэлхийн мисс” тэмцээнд оролцож байгаа миссээ дэмжих ёстой гэдгийг бид маш сайн ойлголоо. Ц.Энхжин маань богино хугацаанд хувийн бэлтгэлээ хангасан ч чамлахааргүй амжилт гаргаж чадлаа. Үүнээс Монголчууд маань нэгдэж чадвал ямар том амжилтад хүрдгийг харж болно” гэв.

---