ТАНИЛЦ: 2050 он хүртэлх Монгол Улсын хөгжлийн АЛСЫН ХАРАА

Д.Сугармаа


-“Итгэл-Зүтгэл-Хариуцлага” сэдэвт зөвлөгөөн боллоо-

Засгийн газрын Хэрэг эрхлэх газраас “Итгэл-Зүтгэл-Хариуцлага” сэдэвт зөвлөгөөнийг Төрийн ордонд зохион байгууллаа. Зөвлөгөөн нь үндэсний хөгжлийн бодлого, үзэл баримтлал, 2018 оны улсын төсвийн талаар аймаг, нийслэлийн Засаг дарга нарт нэгдсэн ойлголт өгч, Засгийн газрын Албан даалгаврыг орон нутагт хэрэгжүүлэх, өвөлжилтийн бэлтгэл хангах талаар үүрэг, чиглэл өгөх зорилготой юм.

Зөвлөгөөнийг нээж Монгол Улсын Шадар сайд Ө.Энхтүвшин үг хэлсэн юм. Тэрбээр "Ирэх онд төсвийн хөрөнгө оруулалт, Орон нутгийн хөгжлийн сангийн хөрөнгийн хэмжээ өмнөх оноос нэмэгдсэн. Иймээс гүйцэтгэгч шалгаруулах, төсвийн болон орон нутгийн хөрөнгөөр бараа, бүтээгдэхүүн худалдан авах, төсөл шалгаруулах ажлаа цаг алдалгүй эхлэх, тэвчиж болох зардлыг хэмнэх, орон тоо нэмэхгүй байхыг аймаг, нийслэлийн Засаг дарга нарт анхааруулъя" гэлээ.

Мөн Засгийн газрын Албан даалгаврын дагуу сахилга хариуцлага, дэг журмыг бүх шатанд чанд баримтлан, үр дүнтэй ажиллахыг чиглэл болголоо.

-Г.Занданшатар: Манай улс 2022-2025 он “Итгэлтэй амьдрах, эрчимтэй хөгжих улс” болно-

Түүний дараа Монгол Улсын сайд, Засгийн газрын Хэрэг эрхлэх газрын дарга Г.Занданшатар үндэсний хөгжлийн бодлогын өнөөгийн байдал, цаашдын зорилтын талаар илтгэл тавилаа. Түүний илтгэлд 

Манай улс 2016 оны байдлаар:

- Хүний хөгжлийн индексээр 188 орноос 92,

- Аз жаргалын индексээр 140 орноос 136,

- Өрсөлдөх чадварын индексээр 138 орноос 102,

- Логистикийн гүйцэтгэлийн индексээр 160 орноос 108,

- Амьдралын чанарын индексээр 192 орноос 107,

- Бизнес эрхлэлтийн үзүүлэлтээр 189 орноос 56,

- Байгаль орчны багц үзүүлэлтээр 140 орноос 111 дүгээр байр эзэлсэн тухай дурдсан юм. 

Түүнчлэн Засгийн газрын хэрэг эрхлэх газрын дарга Г.Занданшатар "Улс орны хөгжлийн алсын харааг 2050 он хүртэл таван үе шаттай тодорхойлоод байна. 2018-2021 онд “Нэгдмэл зорилготой Монгол Улс” болно. Энэ хугацаанд ажлын байрыг нэмэгдүүлж, үйлдвэрлэгч, экспортлогч эдийн засгийн суурь бий болгоно. Мөн уул уурхай, хүнд үйлдвэрлэлийн суурийг тавьж, боловсруулах салбарын өрсөлдөх чадварыг дээшлүүлэн, дэд бүтцээ хөгжүүлэхийг зорьж байна. Томоохон төсөл, хөтөлбөрийг хувийн хэвшилтэй хамтран хэрэгжүүлж, төрийн бүх шатанд иргэддээ ээлтэй засаглалын болон институцийн шинэчлэл хийнэ" гэв. 

  Цаашид :

- 2022-2025 он “Итгэлтэй амьдрах, эрчимтэй хөгжих улс”

- 2026-2030 он “Дунд орлоготой улс орнуудыг тэргүүлэх улс”

- 2031-2040 он “Чинээлэг, аз жаргалтай улс”

- 2041-2050 он ”Технологи үйлдвэрлэгч улс” болохыг зорьж байгааг Монгол Улсын сайд, Засгийн газрын Хэрэг эрхлэх газрын дарга Г.Занданшатар онцоллоо. 

-Ч.Хүрэлсүх: Ирэх оны төсвийн хөрөнгө оруулалтын 40 хувийг сургууль, цэцэрлэг барихад зориулна-

Харин Сангийн сайд Ч.Хүрэлбаатар энэ оны төсвийн тодотгол болон ирэх оны төсвийн талаар аймаг, нийслэлийн Засаг дарга нарт мэдээлэл өглөө. Ирэх оны төсөв хэрэгжсэнээр иргэд, аж ахуйн нэгжийн орлого нэмэгдсэн, төгрөгийн ханш тогтворжиж улмаар чангарсан, зээлийн хүү буурсан байх болно гэж тооцоолж байгааг Сангийн сайд хэлсэн юм.

Төсвийн хөрөнгө оруулалтын 40 хувийг сургууль, цэцэрлэг барих, өргөтгөхөд зарцуулснаар хүүхэд бүр цэцэрлэгт хамрагдаж, гурван ээлжээр хичээллэдэг сургуульгүй болно. Орон нутгийн хөгжлийг дэмжих зорилгоор 147 тэрбум төгрөгийн хөрөнгө оруулалт хийнэ гэдгийг тодотгож байлаа.

Зөвлөгөөнд оролцсон Засгийн газрын гишүүд салбарынхаа өвөлжилтийн бэлтгэл, цаг үеийн ажил, аймаг, нийслэлийн удирдлагууд тухайн орон нутагтаа хийхээр төлөвлөсөн зарим ажлаа танилцууллаа.

Eagle.mn таалагдсан бол
Найздаа илгээх
Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд eagle.mn хариуцлага хүлээхгүй.

Сэтгэгдэл бичих (0)