Гадаад худалдаа, хөрөнгө оруулалтын асуудлаар уулзалтууд хийлээ

Eagle.mn


Гадаад харилцааны яамны Төрийн нарийн бичгийн дарга Д.Даваасүрэн 2017 оны 10 дугаар сарын 9-11-ний өдрүүдэд Женев хотноо болж буй Олон улсын хөрөнгө оруулалтын хэлэлцээрүүдийг шинэчлэх олон улсын бага хуралд оролцох үеэрээ НҮБ-ын Худалдаа, хөгжлийн бага хурлын Хөрөнгө оруулалт, үйлдвэрийн газрын захирал Жеймс Жан, Дэлхийн худалдааны байгууллага /ДХБ/-ын Ерөнхий захирлын орлогч Ёнов Ага, Олон улсын худалдааны төвийн дэд захирал Дороти Тембо нартай уулзаж, хамтын ажиллагааны талаар санал солилцов.

Төрийн нарийн бичгийн дарга Д.Даваасүрэн Монголын хөрөнгө оруулалтын загвар хэлэлцээрийн төслийг НҮБ-ын Худалдаа, хөгжлийн бага хурлын Хөрөнгө оруулалт, үйлдвэрийн газрын захирал Жеймс Жанд гардуулан төсөлд хөндлөнгийн шинжээчийн дүгнэлт гаргуулах, бодлогын зөвлөмж авах талаар хамтран ажиллахаар болов.

Түүнчлэн, ДХБ-ын Ерөнхий захирлын орлогч Ёнов Агатай уулзаж, ДХБ-ын Худалдааг хөнгөвчлөх хэлэлцээр хүчин төгөлдөр болсон нь чухал ач холбогдолтойг дурдаад олон талт хэлэлцээнд Монгол Улсын баримталж буй бодлого, ДХБ-ын хэлэлцээрүүд, худалдааны хэлэлцээ хийх үндэсний чадавхийг бэхжүүлэхэд хамтран ажиллахаар тохиролцов.

Олон улсын худалдааны төвийн дэд захирал Дороти Темботой худалдааг хөнгөвчлөх, монголын экспортыг төрөлжүүлэхэд чиглэсэн хамтын ажиллагааны талаар ярилцав. Олон улсын худалдааны төвөөс боловсруулсан “Монголын экспортыг төрөлжүүлэх” төслийг хамтран хэрэгжүүлэх чиглэлээр талууд хамтран ажиллахаар болов.

Eagle.mn таалагдсан бол
Найздаа илгээх
Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд eagle.mn хариуцлага хүлээхгүй.

Сэтгэгдэл бичих (0)