Нийслэлийн Засаг дарга С.Батболд сургууль, цэцэрлэгийн элсэлт эхэлч, замын хөдөлгөөний ачаалал ихэссэнтэй холбогдуулан төв замаар зүүн эргэхийг хориглосон захирамж гаргасан. Гэвч энэ шийдвэр зарим иргэдэд таалагдсангүй. Улмаар өнөөдөр Баянзүрх дүүргийн 1500 орчим иргэн Нийслэлийн Засаг даргын Тамгын газрын байрны гадна талбайд эсэргүүцлийн жагсаал зохион байгууллаа.

Жагсаалын үеэр иргэд Нийслэлийн Засаг дарга С.Батболдыг огцрохыг шаардаж, иргэдээс гарын үсэг цуглуулж байв.  Мөн тэд Баянзүрх дүүргийг хувааж, хоёр дүүрэг болгох асуудлыг эсэргүүцэж буйгаа мэдэгдлээ.

Энэ талаар жагсаалд оролцож буй Баянзүрх дүүргийн иргэн Т.Батцогт “Өнгөрсөн жилийн хугацаанд нийслэл хотод иргэдийн эрх ашгийг хөндсөн шийдвэр гарч, уур бухимдлыг нэмснээс өөр зүйл алга. Жилийн хугацаанд үндэслэлгүй шийдвэр гаргаж, хууль зөрчсөн нь НИТХ-ыг тараах, С.Батболдыг огцруулах хангалттай үндэслэл болж байна гэж бид үзэж байна” гэв.

Харин Баянзүрх дүүргийн XI хорооны иргэн Б.Булган “Хотын дарга Баянзүрх дүүргийн Засаг даргад эрх бүхий хүнийг хуулийн хүрээнд нэр дэвшүүлж байхад өнөөдрийг хүртэл батлахгүй улс төржүүлсээр байна. Тиймээс улс төржсөн хууль бус үйлдлээ зогсоож, Нийслэлийн Засаг Дарга С.Батболд, НИТХ-ыг бүрэлдэхүүнээрээ огцрохыг шаардаж байна. Түүнээс гадна Баянзүрх дүүргийн хоёр  хуваах шийдвэр гараад байна. 320 мянган иргэнтэй дүүргийг хоёр хуваана гэвэл хамгийн наад зах нь 320 иргэний үнэмлэх шинээр хийх ажил болно. Төрийн засаг захиргааны байгууллагын орон тоо нэмэгдэнэ” гэлээ.

Түүнчлэн тус дүүргийн V хорооны иргэн С.Балдандорж “Баянзүрх дүүргийн газрын албаны дарга тамгаа авч зугтсан нь Баянзүрх дүүргийн олон мянган иргэдийн эрх ашгийг зөрчиж байна. Өнөөдрийг хүртэл газрын гэрчилгээгээ аваагүй, албан ёсоор асуудлуудаа шийдүүлээгүй олон мянган иргэд байна. Нийслэлд залуучууд болоод жуулчидын очиж зугаалдаг байсан Их дэлгүүр орчмын цэцэрлэгт хүрээлэнгээс эхлээд ил далд нурааж, хулгайлж байгаа олон тод жишээ байна. Тиймээс бид хотын даргыг огцрохыг шаардаж тайван жагсаал хийж байгаа юм” гэж ярилаа.

Гурван дүүргийг хамарсан зүүн гар тийш эргэхийг хориглосон шийдвэрийг ч ямар ч судалгаа, үндэслэлгүй гаргаж иргэдийн бухимдлыг нэмж байна.

Чингэлтэй дүүргийн иргэн Ж.Энхбат “Өнгөрсөн хугацаанд хотын дарга маань нохой, мууранд спираль тавихаас өөр дорвитой ажил хийсэнгүй. Ерөнхийлөгчийн сонгуульд ажилласаар байгаад цэцэрлэг, сургуулийнхаа барилгыг ч барьсангүй. Засаг дарга Аз жаргалтай хотыг бий болгоно гэсэн ч иргэд нь бухимдсан, аз жаргалгүй байна. Гурван дүүргийг хамарсан зүүн гар тийш эргэхийг хориглосон шийдвэр ямар ч судалгаа, үндэслэлгүй иргэдийн бухимдлыг нэмж байна. Иргэд үгээ хэлэх эрхгүй болж байна. Зөрчлийн тухай хуулиар бүгдийнх нь амыг барьж байна. Тиймээс өнөөдөр гарч ирж Улаанбаатар хотын иргэдээс уучлалт гуйхыг шаардаж байна” гэв.

Үүний зэрэгцээ жагсаалд оролцсон Баянзүрх дүүргийн АН-ын хорооны гишүүд “Аз жаргалтай Улаанбаатар” мөрийн хөтөлбөр дэвшүүлэн Засаг дарга болсон хэдий ч өнөөдрийг хүртэл судалгаа, шинжилгээгүй олон буруу шийдвэр гаргасны нэг нь Энхтайваны өргөн чөлөө дагуу зүүн эргэхийг хориглосон шийдвэр байсныг онцолсон юм.