Монголын Үйлдвэрчний эвлэлийн 100 жилийн ой тохиож байна

А.Анар-Эрдэнэ


Монгол Улсад Үйлдвэрчний эвлэлийн хөдөлгөөн үүсч хөгжсөний 100 жилийн ой энэ сарын 17-18-ны өдрүүдэд тохиож байна. 1917 онд одоогийн Сэлэнгэ аймгийн Ерөөгийн алтны уурхайд ажиллаж байсан Орос, Монгол ажилчид хөдөлмөрлөх эрхээ хамгаалахаар тэмцсэнээр Монгол Улсад ҮЭ-ийн хөдөлгөөн үүсэх суурийг тавьсан түүхтэй. Өдгөө 100 жилийнхээ босгыг давж буй МҮЭ-ийн байгууллага 450 мянга орчим гишүүн, дэмжигчидтэй, 22 салбар холбоо, мэргэжил үйлдвэрлэлийн 14 салбар холбоотойгоор үйл ажиллагаагаа явуулж байна. Мөн Сонгино амралт, сувиллын газар, Хөдөлмөр, нийгмийн харилцааны дээд сургууль, МҮЭСТО, Альфа зочид буудал гэсэн харъяа газруудтай. Түүнчлэн хөдөлмөрийн маргааны асуудлаар иргэдэд үнэ төлбөргүй зөвлөгөө өгөх, өмгөөллийн туслалцаа үзүүлэн ажиллаж байна. 

Зургийн тайлбар1927 оны Бүх Монголын үйлдвэрчний эвлэлийн анхдугаар хуралдаан. Улаанбаатар хот 1927 он. Эх сурвалж: (ШУА-ийн Түүх, археологийн хүрээлэн Баримт мэдээллийн төв)

Зургийн тайлбар: Монголын үйлдвэрчний эвлэлийн гишүүд Москва хотноо. 1971 он. Эх сурвалж: (ШУА-ийн Түүх, археологийн хүрээлэн Баримт мэдээллийн төв)

Засгийн газар, АОЭНХ-той МҮЭ-ийн холбоо нь хоёр жил тутам хөдөлмөр нийгмийн зөвшлийн гурван талт улсын хэлэлцээр байгуулдаг бөгөөд гэрээний биелэлтийг Засгийн газраас удаа дараа шахаж шаардаж хөдөлмөрчдийн дуу хоолойг төр засагт хүргэсээр ирсэн билээ. МҮЭ-ийн холбоо 100 жилийн ойгоо угтаж энэ сарын 17-ны өдөр МҮЭСТО-нд  “Монголын үйлдвэрчний эвлэл 100 жил” үзэсгэлэнг дэлгэж тавих бөгөөд МҮЭ-ийн холбооны нэрэмжит шагналаар нэр бүхий хүмүүсийг шагнаж урамшуулах юм. Мөн ойн баярын хурал энэ сарын 18-ны өдөр МҮЭСТО-ны их танхимд болно. Мөн өдөр Сүхбаатар, Чингис хааны хөшөөнд МҮЭ-ийн холбооны удирдлагууд нийт гишүүд дэмжигчид, идэвхтэн сонгуультнууд цэцэг өргөж, хүндэтгэл үзүүлнэ.

Eagle.mn таалагдсан бол
Найздаа илгээх
Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд eagle.mn хариуцлага хүлээхгүй.

Сэтгэгдэл бичих (0)