Их хотын залуусын очих дуртай “Galaxy Tower”-ын “Cielo Food’n Bar”-д өчигдөр хоёр Мягмар давхацсан гэнэтийн бэлэг дүүрэг нэгэн үдэшлэг боллоо. Энэ бол “Guys” хамтлагийн дуучин, жүжигчин М.Мягмарын үдэш буюу уран бүтээлийн нээлтийн арга хэмжээ байсан юм.
Дуучин М.Мягмар зүгээр ч нэг энэ өдрийг товлон уран бүтээлээ нийтэд дэлгээгүй юм. Тэрээр Аавуудын баярын өдрийг тохиолдуулан “Бүх цаг үеийн амьдралын жолоог атгагч аав нарт зориулав” хэмээн тодотгосон өөрийн соло уран бүтээл болох “Захиа” дууны клипээ албан ёсоор дэлгэлээ.
2015 онд дуучин М.Мягмар “Юнител” компанитай хамтран “Байна уу, Ээж ээ” соло уран бүтээлээ дэлгэсэн нь үзэгчдийн зүрх сэтгэлийг хөглөн өнөөдрийг хүртэл хэн хүний аманд аяллагддаг тэр л дотно танил дуу нь болон эгшиглэсээр байгаа билээ. Тэр ч утгаараа энэ төсөл үүргээ гүйцэтгэн олон залуусын ээждээ зориулсан нандин үгсийг тээн давлагаалсаар байгаа билээ.
Энэхүү уран бүтээлийн дараа олон сонсогч, үзэгч түүнд хандан аав нарт зориулсан сайхан уран бүтээл хийх захиалга өгөөд байсан нь ийнхүү биелэлээ олон “Байна уу, Ээж ээ” дууны үргэлжлэл болон “Сайн байна уу, Аав аа” төсөл “Захиа” дуугаар үргэлжиллээ. Дуучин М.Мягмар “Байна уу, Ээж ээ” дууны аяыг бичсэн хөгжмийн зохиолч Г.Ононтой энэ төсөл дээрээ дахин хамтран ажилласан бөгөөд өөрөө шүлгийг нь тэрлэжээ.
Тэрээр "Байна уу, Ээж ээ" дууны дараа аавдаа зориулан сэтгэлийн өргөл барих юмсан гэж бодож энэхүү "Сайн байна уу, Аав аа" төслөө хийхээр эхлүүлсэн аж. Аавдаа зориулан гаргаж буй уран бүтээл "Захиа" дуу маань бэлэн болж, өнөөдөр өөрийн дотнын хүмүүс, уран бүтээлийн хамтрагчид, тусалж дэмжиж явдаг хүндтэй хүмүүсийнхээ хүрээнд нээхээр бэлтгэл ажил маань хангагджээ. Энэхүү уран бүтээлд хамтран оролцсон уран бүтээлчид, дэмжлэг үзүүлсэн хамт олон, дотны хүмүүстээ бүгдэд нь баярлалаа” хэмээн баярын сэтгэгдлээ хуваалцсан.
“Алтай групп”, “Алтай констракшн”-ы ерөнхий захирал Х.Батбаасан түүний хамт олон энэхүү уран бүтээлийг дэмжин хамтран ажиллажээ. Тэрээр дуучин М. Мягмарын “Сайн байна уу, Аав аа” төслийг уриалагханаар дэмжжээ. Х.Батбаасан: “Хүн бүр эцгээрээ бахархан амьдралын ухаанаа заалгаж явдаг учраас түүний шинэ уран бүтээл, төсөл сэтгэлд маш ойрхон ирсэн. Тиймдээ ч манай компани, группийнхэн энэхүү уран бүтээлийг дэмжин ажиллалаа” хэмээн сэтгэгдлээсээ хуваалцсан юм. Түүний аав А.Хадбаасан тээврийн жолооч учраас энэхүү уран бүтээлээр дамжуулан аавдаа бэлэг барьж буйгаа илэрхийлсэн юм.
Тэрээр клипээ дэлгэсний дараа баярын нулимсаа нуугаагүй юм. “Сүүлийн таван сар энэ л үдшийн төлөө нойроо хасан байлаа” хэмээн нулимс дуслуулан аавдаа зориулан бүтээсэн уран бүтээлээ өлгийдөн авсан юм.
Түүний уран бүтээлийн нээлт дээр “Guys” хамтлагийнхан нь хайрт аав Мондооных нь хөрөг зургийг бэлэглэсэн нь гэнэтийн бэлэг байлаа.
Аавдаа зориулсан түүний сэтгэлийн өчил ийнхүү “Захиа” болон мэндэллээ.
Дуучин М.Мягмар энэхүү уран бүтээлийг үзсэн хүн бүр зүрх сэтгэлдээ нандигнан байгаа тэр л үгсээрээ аавдаа зориулан захиа бичээсэй гэж хүсэж байна хэмээн уриалсан юм.
“Зүүн чихэнд минь гурвантаа шивнэж өгсөн нэрийг тань Зүг зүгийн салхинаас сонстол цуурайтуулна аа Аав аа! Цагийн эрх, жамын ёсоор дэргэд минь үгүй ч Цал буурал таныгаа зүрхэндээ үргэлж тээн, нандигнаж явна аа Аав аа!”
