“Түүхээ мэдэхгүй хүн ойд төөрсөн сармагчин лугаа адил” гэх үг бий. Тэгвэл та бид Монголынхоо түүхийг, эх орныхоо өнгөрснийг, өвөг дээдсийнхээ үйл хэргийг яг таг мэддэг үү. Бүтнээр нь бус юм гэхэд зах зухаас нь, үгүй ядахнаа бага сага ч болов гадарладаг уу. Тэгвэл энэ асуултад хариулахад тань туслах маш олон бүтээл өнгөрсөн найман жилийн хугацаанд Ерөнхийлөгч Ц.Элбэгдоржийн дэмжлэгтэйгээр хийгджээ. “Ардын үг” иргэдийн зөвлөлдөх аяны хүрээнд энэ талын мэдээллийг танд хүргэж байгаагийн нэг нь “Монголын түүхий цахим тайлбар толь” юм.

Түүхийг цахимаар сонсож, унших боломжийг олгож буй уг бүтээл нь орчин үеийн монгол бичиг, уйгаржин бичиг, аудио хэлбэрээр хийгдсэн бөгөөд 2000 гаруй гэрэл зураг, түүхийн баримт, эх сурвалж, 4000 гаруй нэмж дэлгэрүүлж унших ном зэргийг багтаажээ.

Түүхийг цахимаар сонсож, унших боломжийг олгож буй уг бүтээл нь орчин үеийн монгол бичиг, уйгаржин бичиг, аудио хэлбэрээр хийгдсэн бөгөөд 2000 гаруй гэрэл зураг, түүхийн баримт, эх сурвалж, 4000 гаруй нэмж дэлгэрүүлж унших ном зэргийг багтаажээ. Энэ талаар ШУА-ийн Түүх, археологийн бүс нутаг ба орчин үеийн түүхийн салбарын эрхлэгч Г.Мягмарсамбуугаас тодруулахад “Цахим толийг бүтээхдээ бид юун түрүүнд Монголын түүхийн гол 3000 орчим толгой үгийг гаргасан. Эдгээрээс дахин шилж сонгож, 1000 толгой үгийг гаргасан байгаа.

Ингээд тус тайлбар тольдоо 1000 толгой үгэнд тайлбар хийсэн. Нэгд, кирилл бичгээр, хоёрт, монгол бичгээр, гуравт унших боломжтойгоор байрлуулсан. Үг болгон тайлбар болох 1-3 гэрэл зурагтай бүтсэн. Өөрөөр хэлбэл, Монголын газар нутагт хүн бүтсэн цагаас хойш өнөөг хүртэлх гол үйл явдлуудыг илэрхийлэх толгой үгүүдийг сонгож цахим тайлбар тольдоо багтаасан” гэв.

Цахим тайлбар толь бичгийг цаашид улам сайжруулж, 5000 гаруй толгой үгтэй болгох аж. Хэрэв Та “Монголын түүхийн цахим тайлбар толь”-ийг уншихыг хүсвэл www.mongoltoli.mn цахим хуудаст зочлоорой.