СУРВАЛЖЛАГА: Итгэл сэтгэлийн хандиваар боссон гэрт илүү олон хүүхдийн дуу цангинана

-Өөрийн зургаа, өрөөлийн 17 хүүхэд асарч халамжилж буй М.Сарнай-

Манай сурвалжлах групп долоо хоногийн өмнө /2017.02.03/  эгэл бор амьдралтай ч энгүй ачлалтай, энгийн нэгэн ээж М.Сарнайгийн гэрээс бэлтгэсэн сурвалжлагаа уншигчдадаа хүргэсэн билээ. Сурвалжлагыг ЭНДЭЭС уншаарай.

М.Сарнайд бусдаас илүүрхэх эд хөрөнгө, эрх мэдэл, албан тушаал аль нь ч үгүй. Харин түүнд хэнд ч байхгүй тэсвэр тэвчээр, энэрэнгүй сэтгэл, эх хүний агуу хайр л бий. Яг өнөөдрийн байдлаар М.Сарнайн дөрвөн ханатай жижигхэн гэрт өөрийн зургаан хүүхдээс гадна асран хамгаалах хүнгүйн улмаас хогийн цэгт өсч байсан, архины хамааралтай эцэг эхтэй 17 хүүхэд амьдарч байна.

Бүсгүй сарын 260 мянган төгрөгийн орлоготой ч энэ олон хүүхдийг хүйтэнд хөргөлгүй гэдэс цатгалан, бяцхан зүрхийг нь айдсаар бус хайраар бялхуулж буй ачлалт ээж.

-М.Сарнайн хүүхдүүд зургаан ханатай шив шинэхэн өргөө цагаан гэртэй боллоо-

Хэрвээ уншигч та санаж байвал М.Сарнай манай сайтад өгсөн ярилцлагадаа “Эгч нь уг нь сайхан байшинтай байсан юм. Хамгийн бага дүү минь хэрэгт холбогдоод шүүхээс 25 жилийн ял авахаар болоход нь байшингаа зараад мөнгөөр нь ялыг нь хөнгөлүүлсэн юм. Гэхдээ одоо өөрийн гэсэн хашаатай, гэртэй байгаа. Энэ жил ийшээ ойрхон газар авсан. Энэ гэр, хашаагаа хүүдээ өгөөд шинэ газартаа нэг сайхан гэртэй болчихвол хүүхдүүдээ аваад очиж амьдрана гэж боддог. Томхон гэртэй болчихвол манайд ирнэ гэсэн хүүхдүүд зөндөө л байгаа” хэмээн хүсэл мөрөөдлөөсөө хуваалцсан шүү дээ.

Тэгвэл түүний энэхүү хүсэл биелэлээ олж, М.Сарнай болон түүний хүүхдүүд өчигдөр зургаан ханатай шив шинэхэн өргөө цагаан гэртэй боллоо. М.Сарнайн энэхүү мөрөөдөл бидний хэзээний танил С.Хорлоо эмээгийн Ц.Сувд-Эрдэнэ болон “Итгэл сэтгэлийн гүүр” сангийн залуусын эхлүүлсэн хандивын аяны тусламжтайгаар биеллээ олсон юм.

Тэд "Сайхан сэтгэлт М.Сарнай эгчид асрамжийн төв байгуулж өгье" гэх хандивын аяныг арав хоногийн өмнө эхлүүлсэн билээ.

ФОТО СУРВАЛЖЛАГЫГ ЭНДЭЭС ҮЗЭЭРЭЙ.

-Ц.Сувд-Эрдэнэ: Удахгүй М.Сарнай эгчдээ “Өдөр өнжүүлэх төв” барьж өгнө-

“Манай сангийнхан 10 хоногийн өмнө М.Сарнай эгчтэй танилцаж, тэдний нөхцөл байдалтай танилцан "Сайхан сэтгэлт М.Сарнай эгчид асрамжийн төв байгуулж өгье" гэх хандивын аянаа эхлүүлсэн. Энэ хугацаанд хандивын дансанд 2 сая 860 гаруй мянган төгрөг цугларч, өнөөдөр тэдэнд зургаан ханатай шинэ гэр авч өглөө. Хандив тусламж өргөсөн монгол түмэндээ баярлалаа. Та бүхний л дэмээр М.Сарнай эгч, энэ олон хүүхэд ийм сайхан гэртэй боллоо.

Түүнтэй анх уулзахад “Эгч нь том гэртэй болчихвол манайд ирье гэсэн хүүхэд маш олон байгаа” гэж байсан болохоор бид эхний ээлжинд хандивын дансанд цугларсан мөнгөөрөө тэднийг гэртэй болгоё гэж шийдлээ. Хандивын аян минь үүгээр дуусаагүй, үргэлжилж байгаа. Тун удахгүй М.Сарнай эгчийгээ “Өдөр өнжүүлэх” төвтэй болгоно. Эхэндээ бид асрамжийн газартай болгоё гэж бодож байлаа. Гэхдээ энэ хүүхдүүд ихэнх нь аав, ээжтэй тул асрамжийн төв гэх нь тохиромжгүй санагдсан л даа” хэмээн Ц.Сувд-Эрдэнэ ярьсан юм.

-Энэ олон хүүхдийг дулаан гэртэй болгож байгаадаа үнэхээр баяртай байна-

Биднийг ийн ярьж байхтай зэрэгцэн М.Сарнайгийн шинэ гэрийг ачсан ачааны машин хашаанд нь орж ирэх нь тэр. Хүүхдүүд ачааны машиныг харж баяр хөөр болцгооно. Харин “Итгэл сэтгэл гүүр” сангийн залуус ханцуй шамлан гэрийг машинаас буулгаж барьж эхлэв.

Гадаа хүйтэн ч сэтгэлийнхээ дулаанд халууцах залуусын нэг “М.Сарнай эгчийг гэхээс илүүтэй энэ олон хүүхдийг гэртэй болгож буйдаа бид үнэхээр баяртай байгаа. Бид хийж байгаа ажлаараа “Монголчууд нэгдэж чадвал юуг ч бүтээж чаддаг юм шүү” гэдгийг олон хүнд ойлгуулахыг хүсдэг.

“Асрамжийн газартай болно доо” гэдэг Сувдаа эгч бид хоёрын нэг мөрөөдөл байдаг юм. Энэ мөрөөдлөө М.Сарнай эгчтэй уулзсанаас хойш илүү бодож, заавал биелүүлэх ёстой юм байна гэж ойлгосон. Биелүүлнэ гэдэгтээ ч итгэлтэй байна” хэмээн Л.Отгонжаргал ярьсан юм.

-М.Сарнай: Бидэнд туслаж байгаа олон түмэндээ баярлалаа-

Хүүхдүүд “Бид энэ гэрт амьдрах юм уу. Ямар том юм бэ. Гоё доо” хэмээн шинэ гэрээ тойрон гүйлдэнэ. Харин М.Сарнай “Энэ том гэртээ хүүхдүүд минь нуугдаж тогловол олдохгүй байх аа. Ёстой нэг дураараа тоглож, үймэлдэх байх даа. Та нарыг ирээд явснаас хойш ахиад долоон хүүхэд нэмж ирсэн. Манайд ирье гэсэн хүүхэд ахиад ч олон бий. Тэднийгээ авчирна аа. Эгч нь энэ гэрийг “Ямар сайхан хээтэй, том гэр вэ” гээд зах дээр явж байхдаа харж байсан шүү дээ. Бидэнд тусалж байгаа олон түмэндээ баярлалаа. Баярлалаа гэдэг үг ч багадах байх. Сувдаа маань биднийг өдөр өнжүүлэх төвтэй болгоно л гээд байгаа. Тэгвэл эгч нь тэр төвдөө зөндөө олон хүүхэд аваад насаараа тэднийгээ асарч, халамжлана аа” хэмээн баярын нулимс дуслуулна.

...Улаанбаатарт 25 хэмийн хүйтэн, 22:00 цаг болж байхад залуус “Нэг хоёрын гурваа” хэмээн хүчээ нийлүүлэн шинэ гэрийн бүслүүрийг татав. 

ФОТО: Хогийн цэгт өсч байгаа олон хүүхдийг асарч, халамжилж буй М.Сарнай шинэ гэртэй боллоо

ЯРИЛЦЛАГА: М.Сарнай: Гэрээрээ дүүрэн бурхантай хүн шүү дээ, би

ГЭРЭЛ ЗУРГИЙГ БОЗАД:


Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд eagle.mn хариуцлага хүлээхгүй.

Сэтгэгдэл бичих (2)

  1. Taivan amgalan torhtoi yuma ta Taavaar osoh onor huuhedtei yuma ta Talarhaliig ni huleesen orgon olontoi yuma ta Tanid sain saihan buhniig husye.

    0 0 Хариу бичих
  2. Гайхамшиг

    0 0 Хариу бичих

ЭНЭ ТУХАЙ